ՄԱԿ-­ի ծրագիրը նախատեսում է մինչև 2030­-ը կանխել ՁԻԱՀ­-ի համաճարակը. artsakhpress.am

`

«Արմենպրես»-ի փոխանցմամբ` ծրագրի ղեկավարները մտադիր են իրականացնել այդ առաջիկա հինգ տարիներին՝ կիրառելով այնպիսի մոտեցումներ, որոնք կարագացնեն համաճարակի կանխարգելմանն ուղղված միջամտությունները:

«Միջամտությունների արագացման նպատակային թիրախների իրագործումը հնարավորություն կտա կանխելու ՄԻԱՎ վարակի մոտ 28 մլն նոր դեպք, ՁԻԱՀ-ով պայմանավորված հիվանդություններից՝ մահվան 21 մլն դեպք և մինչև 2030 թվականը վերջ դնել ՁԻԱՀ-ի համաճարակին»,- ասվում է զեկույցում:

Զեկույցում առանձնացվել են նաև հետևյալ թիրախները. մինչև 2020 թվականը ՄԻԱՎ-ով ապրող մարդկանց 90 տոկոսը պետք է տեղյակ լինի  իր կարգավիճակի մասին, նրանց 90 տոկոսը ստանա համապատասխան բուժում, իսկ բուժում ստացողների 90 տոկոսի մոտ արձանագրվի վիրուսային ծանրաբեռնվածության կայուն իջեցում` մինչև չհայտնաբերվող մակարդակ: Ծրագրվում է նաև յուրաքանչյուր տարի ավելի քան 75 տոկոսով կրճատել ՄԻԱՎ վարակի նոր դեպքերի թիվը` 2020 թվականին հասնելով 500 հազարի, և, վերջապես, խտրականության վերացում:

ՄԻԱՎ վարակի առաջին դեպքերի արձանագրումից ի վեր աշխարհում ՄԻԱՎ-ով վարակվել է շուրջ 78 մլն մարդ: Նրանցից 39 միլիոնը մահացել է ՁԻԱՀ-ով պայամանավորված հիվանդություններից: 2013 թվականին ՄԻԱՎ-ով ապրող մարդկանց թիվն աշխարհում եղել է մոտ 35 մլն` 2001 թվականի 30 մլն-ի դիմաց:

Ընդհանուր առմամբ աշխարհում նվազում է ՄԻԱՎ-ով վարակման  նոր դեպքերի թիվը: Մասնավորապես` 2013 թվականին ՄԻԱՎ-ով վարակվել է մոտ 2,1 մլն մարդ, ինչը 38 տոկոսով պակաս է 2001 թվականի համեմատ:

Հարցեր, պատասխաններ, մեկնաբանություններ