Հակաբիոտիկների մասին իրազեկման օրը եվրոպական տարածաշրջանը նշում է «Ամենուրեք պատասխանատու է յուրաքանչյուր ոք» կարգախոսով

Նոյեմբերի 18-ը Եվրոպայում հակաբիոտիկների մասին իրազեկվող օրն է: 2014թ. հակաբիոտիկների մասին իրազեկման օրը եվրոպական տարածաշրջանը նշում է «Ամենուրեք պատասխանատու է յուրաքանչյուր ոք» կարգախոսով: Այդ մասին այսօր Հայաստանի ամերիկյան համալսարանի բիզնես կենտրոնում կայացած ասուլիսի ժամանակ խոսել են ՀՀ առողջապահության նախարարության, Առողջապահության համաշխարհային կազմակերպության հայաստանյան գրասենյակի (ԱՀԿ) և ՀՀ ԱՆ Դեղերի ու բժշկական տեխնոլոգիաների փորձագիտական կենտրոնի  ներկայացուցիչները:  

Բանախոսների փոխանցմամբ`Եվրոպայում հակաբիոտիկների մասին իրազեկման օրը, ԱՀԿ-ն կոչ է անում դեղագործական ծառայությունների օգնությամբ խթանել հակամանրէային դեղերի խելամիտ օգտագործումը Եվրոպայում:

«Պետք է փոխել բնակչության շրջանում արմատացած այն պատկերացումները, թե դեղատունը խանութի պես մի բան է, և դեղագործական ծառայությունների մի նոր մշակույթ ձևավորել: Որոշ երկրներում այդ մշակույթն արդեն իսկ ձևավորվում է, սակայն անհրաժեշտ է, որպեսզի այս նոր մոտեցումն ամենուրեք կանոն դառնա»,- ասել է ԱՀԿ Եվրոպական տարածաշրջանային գրասենյակի տնօրենը` հավելելով, որ դեղերը բնակչությանը դուրս են գրում դեղագետների կողմից, ուստի նրանք մեր կարևոր դաշնակիցներն են հակամանրէային դեղերի նկատմամբ կայունության դեմ պայքարում: Հետևաբար, դեղագետները պետք է հնարավորություն ունենան ճշգրիտ տեղեկություններ տրամադրելու և խորհրդատվություն իրականացնելու հակաբիոտիկների պատշաճ կիրառման վերաբերյալ: 

Վերջին ուսումնասիրությունները ցույց են տվել, որ հակամանրէային դեղերի նշանակումների ավելի քան 40%-ը հիմնավորված չէ:
Բանախոսների փոխանցմամբ՝ խոսքը հատկապես վերաբերում է մրսածության և անգինայի ժամանակ նշանակվող հակաբիոտիկներին: Նշված հիվանդություններն առավել հաճախ պայմանավորված են վիրուսներով, իսկ հակաբիոտիկները վիրուսների վրա չեն ազդում: Բացի այդ, մի շարք երկրներում մարդիկ հակված են ինքնաբուժությամբ զբաղվելու: Հակամանրէային դեղերի ոչ ռացիոնալ կիրառումը հակաբիոտիկների նկատմամբ հարաճող կայունության հիմնական շարժիչ ուժն է:

Ի դեպ, այս երևույթի դեմ պայքարելու համար ՀՀ առողջապահության նախարարությունը նախատեսում է իրականացնել համակարգված միջոցառումներ` ապահովելով համաճարակաբանական հսկողություն, հակաբիոտիկների կիրառման մշտադիտարկում, ներդնելով որակի ապահովման համակարգ, միջոցներ ձեռնարկելով կանխելու հակաբիոտիկների անկառավարելի կիրառումը` միայն դեղատոմսերով դրանք բաց թողնելու, նշանակման հիմնավորվածությունն ու ճիշտ դեղաչափումը վերահսկելու ճանապարհով, միաժամանակ անհրաժեշտ է մշտապես թարմացնել բուժօգնություն և սպասարկում իրականացնող կազմակերպություններում ախտորոշիչ միջոցների զինանոցը, բարձրացնել բնակչության և առողջապահական ոլորտի մասնագետների իրազեկությունը, իրականացնել դեղակրթական միջոցառումներ և քարոզարշավներ:

Հարցեր, պատասխաններ, մեկնաբանություններ