Մասնագետի խորհուրդները. առավել առաձգական կուրծք ջրային մերսման օգնությամբ

Կանացի կրծքի գեղեցկությունը կախված է ոչ թե դրա չափից, այլ ձեւից, ավելի ճիշտ՝ դրա առաձգականությունից եւ պրկությունից: Ցավոք, շատ կանայք սխալմամբ կարծում են, որ կրծքերի խնամքը ենթադրում է միայն հատուկ կրեմների եւ քսուքների պարբերական օգտագործումը: Եվ սա կանացի ամենախոր մոլորություններից է: Հարցն այն է, որ կանացի կուրծքը կազմված է կաթնագեղձերից, որոնք շրջապատված են կապակցող եւ ճարպային հյուսվածքներից: Տարիքի հետ կրծքամկանները թուլանում են, ինչը հանգեցնում է կաթնագեղձերի իջեցմանը: Այդ պատճառով միայն քսուքների օգնությամբ կրծքերի խնամքն ապահովելն անիմաստ է: Դուք միայն կբարելավեք կրծքի մաշկի վիճակը: NEWS.am STYLE-ը դիմել է մերսման մասնագետ Լիլիթ Ներսեսյանին՝ խնդրելով մեր ընթերցողներին մի քանի խորհուրդ տալ: Պարզվում է, կրծքի առաձգականությունը պահպանելու ամենից արդյունավետ միջոցը ջրային մերսումն է:

«Հայտնի է, որ մերսումը կարող է կարճ ժամանակում ցանկացած մկան պրկել, ուժեղացնել արյան շրջանառությունն ու ավշային դրենաժը, ազատել մկանային ցավից, արագացնել նյութափոխանակությունը եւ բարելավել օրգանիզմի ընդհանուր վիճակը: Պարզ է, որ խոսքը սովորական մերսման մասին է, որը կրծքի համար այնքան էլ համապատասխան չէ, եւ ոչ միայն ցավոտ զգացողությունների, այլեւ կաթնագեղձերի լուրջ վնասվածք ստանալու վտանգի պատճառով: Այդ պատճառով դասական մերսումը փոխարինում ենք ջրային մերսմամբ: Ջրային մերսումը կրծքի վրա ավելի մեղմ ազդեցություն է թողնում եւ միաժամանակ հիանալի տոնուս հաղորդում»,- ասում է մասնագետը:

Ջրային մերսումը ցանկացած կին կարող է ինքնուրույն անել: Դրա համար ձեզ անհրաժեշտ է միայն ցնցուղ: Կրծքի ջրային մերսման համար ամենալավ ժամանակն առավոտն է: Սահմանեք ձեզ հարմար ջրի ճնշման չափն ու ջերմաստիճանը: Մաշկի արյան մատակարարման եւ առաձգականության բարելավման համար ջուրը պետք է լինի ոչ շատ տաք, բայց ոչ էլ շատ սառը: Սա ջրային մերսման գլխավոր կանոնն է:

Ջրի շիթն ուղղեք դեպի կրծքի ներքեւի հատվածը եւ շրջանաձեւ շարժումներով մերսեք ներքեւից դեպի վերեւ, այնպես, կարծես ցանկանում եք այն բարձրացնել: Այդ գործողությունը յուրաքանչյուր կրծքի համար կրկնեք ոչ պակաս, քան 10 անգամ՝ խուսափելով ծծակների հատվածից: Այնուհետեւ նույնը կրկնեք՝ կրծքի ներքեւի հատվածից դեպի թեւատակերը: Այնտեղից ուղղվեք դեպի դեկոլտեի հատված եւ մերսումն ավարտեք կրծքերի մեջտեղի հատվածում: Այս գործողությունը կրկնեք 10 անգամ յուրաքանչյուր կրծքի շրջանի համար:

Հարցեր, պատասխաններ, մեկնաբանություններ