Դեզադորներ

Ժամանակակից աշխարհում կենցաղն իսկական ցայտնոտ է, վազվզուք, աշխատանք, տուն խանութ, դասընթացներ ու հանդիպումներ, խոհանոց ու լվացք: Մի խոսքով, իսկական քաոս: Այս ռիթմով ենք ապրում անընդհատ: Ողբալի պատկեր է: Մեզանով զբաղվելու ժամանակ էլ գրեթե կամ ընդհանրապես չի մնում:

Անընդհատ վազվզոցի մեջ մարմնի ջերմաստիճանի տատանման հետևանքով ստիպված ենք բազմաթիվ ու բազմազան միջոցներ օգտագործել առատ քրտնարտադրությունից ու տհաճ հոտից պաշտպանվելու համար:

Անհամար են այդ նպատակին ծառայող միջոցները. ցողաշիթ. գնդիկավոր հակապերսպիրանտ, քսուքանման ու կոշտ, գելանման միջոցներ:  Ուրախանում ենք, որ այդ տհաճությունները չեզոքացնելու կամ նվազեցնելու միջոցներ կան:

Սակայն ի՞նչ ազդեցություն են դրանք ունենում առողջության վրա: Տարակարծություններ կան` կապված դրանց հետ:

Սովորական ցողաշիթը չեզոքացնում է տհաճ հոտը, սակայն քրտինքից ազատել ի զորու չէ: Իսկ հակապերսպիրանտները խցանում են  մշակվող հատվածն ու պարզապես թույլ չեն տալիս, որ քրտինքը դուրս գա և, հետևաբար, տհաճ հոտ տարածի: Իսկ վտանգավո՞ր է, արդյոք, երբ հոտազերծիչը խցանում է մաշկի  ծակոտիները: Գիտնականներն ասում են, որ եթե փորձենք ամբողջ մարմինը պատել հոտազերծիչով, ապա ինքնազգացողության վատացում հնարավոր է և լինի, սակայն անութները մշակելով` մեր ինքնազգացողությունը չենք վտանգում:

Համենայն դեպս, բժիշկներն առաջարկում են հակապերսպիրանտ օգտագործել քիչ քրտնող մարդկանց, այն էլ ֆիզիկական ծանրաբեռնվածությունից առաջ, օրական 10 ժամից ոչ ավելի: Եթե պատրաստվում եք մարզադահլիճ գնալ, ապա նկատի ունեցեք, որ մի լավ քրտնելու եք: Սպորտը պետք է օգուտ տա: Այդ դեպքում ավելի լավ է սովորական ցողաշիթ կիրառել, որը  թեկուզ և չի կասեցնում քրտնարտադրությունը, սակայն, փրկում է տհաճ հոտից:

Լողափ գնալուց կամ էլ սոլյարի հաճախելուց առաջ ճիշտ կլինի լողանալ, քանի որ ուլտրամանուշակագույն ճառագայթների ազդեցությամբ հոտազերծիչ միջոցների բաղադրության մեջ առկա որոշ քիմիական նյութեր  հնարավոր է` մարմնի վրա մուգ հետքեր թողնեն: Կյանքն առաջ է գնում, նոր միջոցներ են ի հայտ գալիս, որոնք պետք է ստուգվեն ժամանակով, դրանց մասին եզրակացություններ անելը դեռևս վաղ է :

Իսկ եթե դեմ եք ցանկացած հոտազերծիչի, ուրեմն պետք է խստիվ հետևեք հիգիենային:

Հարցեր, պատասխաններ, մեկնաբանություններ