Դիմահարդարման անօգուտ միջոցներ. ինչի վրա գումար չարժե ծախսել

Լավ տեսք ունենալու համար շատերս ենք պատրաստ մեծ գումար ծախսել ու  դիմահարդարման պարագաների մի ամբողջ զինանոց ձեռք բերել, սակայն, չնայած գովազդին ու խոստացված արդյունքին, հաճախ հասկանում ենք, որ քսուքին կամ տարբեր միջոցներին վերագրվող որակներն ու հատկությունները, մեղմ ասած, չափազանցված են, եթե չասենք` ընդհանրապես չեն համապատասխանում:

Բացի այդ, հաճախ ենք մոռանում, որ մաշկի ու ընդհանրապես արտաքին խնդիրների արմատները շատ ավելի խոր շերտերում են թաքնված: Չէ՞ որ կոսմետիկ միջոցները չեն կարող թափանցել   խնդրահարույց  օջախ ու  թերությունը վերացնել:

Գոյություն ունեն մարմնի, դեմքի ու մազերի խնամքի  6 տեսակ միջոցներ, որոնց կիրառումը բացարձակ զուրկ է իմաստից, հետևաբար` գնելն անօգուտ ու ծախսն էլ` չարդարացված: Թվարկենք:

1. Աչքերի տակ  առաջացած մուգ  շրջանակների դեմ միջոցները

Ոչ մի քսուք չի  կարող վերացնել այդ բծերը, դրանք ընդամենը կարելի է քողարկել: Երբեմն աչքի տակի կապտավուն երանգը բնածին  առանձնահատկություն է` պայմանավորված արյունատար անոթների մակերեսայնությամբ: Այդ դեպքում տրամաբանենք` ինչով կարող են քսուքները մեզ օգնել: Իհարկե` ոչնչով:  Իսկ եթե դրանք անքնության կամ վատ քնի հետևանքով են առաջանում, բնականաբար կանհետանան լավ քնելուց հետո:

2. Երիտասարդացնող  միջոցներ

Գովազդը հաճախ խոստանում է, որ «առաջարկվող միջոցը հրաշքներ կգործի, որ այն «երիտասարդություն պարգևող իսկական ոգեթուրմ է». պարզապես հարկավոր է  որոշակի քանակությամբ այդ քսուքից օգտագործել, ու ով հրաշք, այն երկար սպասեցնել չի տա, կտեսնեք, թե ինչպես եք «երիտասարդանում մի քանի տարով»:

Մաշկն այնպիսի կառուցվածք ունի, որ ոչ մի քսուք ու  միջոց չի կարող թափանցել խորը շերտեր:  Որոշ տեսանելի արդյունք ստացվում է, այն էլ մաշկի խոնավացման շնորհիվ: Եթե քսուքներն իսկապես երիտասարդացնեին ու հավերժական երիտասարդություն պարգևեին, ապա կոսմետիկ վիրաբույժները պարզապես անգործության կմատնվեին:

3. Մարմնի փիլինգի միջոցներ

Փիլինգի  բոլոր միջոցները բնական մրգերի   կորիզների կամ արհեստական մասնիկների ու գելի խառնուրդ են:

Ամենասովորական լոգարանային ճիլոպը լրիվ նույն փիլինգ-արդյունքն է տալիս, ինչ և  ամենաթանկարժեք միջոցը:

4. Հակացելյուլիտային միջոցներ

Ինչքա~ն շատ է գրվում, թե ցելյուլիտն առաջանում է  մի ամբողջ փունջ պատճառներով, որում հիմնականը հորմոնալ  խանգարումն է,  չհավասարակշռված սնունդը, ֆիզիկական նվազ ակտիվությունը և, վերջապես, գենետիկական նախատրամադրվածությունը: Այդուհանդերձ, կանայք ողջ աշխարհում գնել ու գնում են  մի շարք միջոցներ, որոնք  իբր օգնելու են  ոչ թե դրա առաջացման պատճառի, այլ հետևանքի վերացմանը: Այնուամենայնիվ ասենք, որ բոլոր միջոցներն էլ ինչ-որ արտաքին արդյունք տալիս են, քանի որ խոնավացնում են մաշկի արտաքին շերտը: Սակայն դեռևս ոչ մի միջոց չի կարող կանխել կամ լրիվ վերացնել ցելյուլիտը:

5. Մազերի սննդարար դիմակներ

Մազի կառույցն այնպիսին է, որ առանց  արմատի վրա նպատակային ներգործության` անհնար է բարելավել որակը: Դիմակներն ընդամենը ժամանակավոր են սոսնձում մազերի շերտատված թեփուկները, ինչը թեթևացնում է սանրվելը:  Սակայն շերտատված մազերը երբեք առողջ տեսք չեն ստանա  միայն դիմակների շնորհիվ, այս դեպքում միակ ճիշտ ուղին վարսավիրանոց  գնալն է:

6. Շամպուններ  թեփի դեմ

Թեփի պատճառը մաշկի մազածածկույթի հատվածում  ճարպագեղձերի ֆունկցիայի խանգարման հետևանքով սնկերի չափազանց  բազմացումն է, դրա համար կիրառվող շամպունը պետք է  ոչնչացնի այդ սունկը: Այդ դեպքում հարկավոր է բուժիչ շամպուններ կիրառել, որոնք վաճառվում են դեղատներում: Իսկ խանութում վաճառվող շամպունները բուժիչ բաղադրիչներ չունեն, դրանք ընդամենը մի քիչ նվազեցնում են ճարպագեղձերի աշխատանքը:

Փայլող ու հարթ մաշկը, մետաքսանման մազերը, բարեկազմ մարմինը յուրաքանչյուրիս երազանքն են: Կասկած չի հարուցում, որ  առանց դիմահարդարման բազմազան միջոցների անհնար է պատկերացնել դրանց խնամքը: Ու երբեք չպետք է մոռանալ, որ մեր արտաքինը մեծ մասամբ մեր սովորությունների ու ապրելակերպի հետևանք է ու առողջության ցուցանիշ: Գուցե արժե ավելի շատ  ուշադրություն հատկացնենք մեր առողջությանը, փորձենք լսել օրգանիզմին, իսկ քսուքները միշտ կան ու կան:

Հարցեր, պատասխաններ, մեկնաբանություններ