Մաշկաբան, բժիշկ-կոսմետոլոգ Գայանե Վարդանյանն այսօր ասուլիսում ասաց, որ հատկապես ձմռանը սրվում են մաշկային հիվանդությունները` փսորիասը, էկզեման, անցումային շրջանի կոյակները:

Նրա խոսքով հայերին բնորոշ է յուղոտ մաշկը: Այդ պատճառով էլ մաշկաբանին, հիմնականում, դիմում են սեբորիայի ու անցումային շրջանին հատուկ կոյակների խնդիրներով:

Ինչպես մասնագետը նշեց, ձմռան ամիսներին նկատվում է նաև մազաթափության աճ, որը նույնպես կապված է արյան շրջանառության ու նյութափոխանակության նվազման հետ:

«Մենք շատ ուշադրություն չենք դարձնում, որ ձմռանը, բացի հիվանդությունների սրումից, հարկավոր է մազերը պաշտպանել նաև չոր ու ցուրտ եղանակից: Դրա համար, բացի խնամքի տարբեր միջոցներից, հարկավոր է գլխարկ կրել»,-ասաց նա:

Մաշկային հիվանդությունների ավելացումը, սրացումն այս ամիսներին, մասնագետի խոսքով, պայմանավորված է նաև դեղային և ընդհանուր իմունիտետի ընկնելով:

Ըստ նրա, չոր մաշկն անպաշտպան մաշկ է, դրա համար պետք է նույնիսկ կարողանալ այն ճիշտ խոնավեցնել:

Այժմ, Գ. Վարդանյանի խոսքով, ժամանակակից բժշկությունը կարող է առաջարկել բուժական կոսմետիկաներ, որոնք պարունակում են մաշկի բաղադրությանը մոտ միջոցներ, ինչն էլ թույլ է տալիս երկարատև ապահովել հիվանդությունների ռեմիսիաները` առանց անտիբիոտիկների ու հորմոնների օգտագործման:

«Երբ տեսնում եք, որ մաշկն արդեն անկառավարելի է և դուք չեք կարողանում որևէ բան անել, խնդրում ենք, դիմեք մասնագետներին և թույլ մի տվեք, որ դանակը ոսկորին հասնի»,-խորհուրդ տվեց մասնագետը:

Մաշկաբանը վերջում ավելացրեց, որ ճիշտ ժամանակին հիվանդությունները կանխելու դեպքում կարելի է շատ լուրջ խնդիրներից զերծ մնալ: