Ամոսովի խորհուրդները սնվելու, ֆիզիկական ակտիվության ու առողջ կենսակերպի մասին

Առողջությունը պահպանելու համար մեզ պաշարներ են անհրաժեշտ: Դրա համար ինչ-որ կենսակերպ վարելը քիչ է, պետք են մարզումներ, որոնք տարիքի հետ կօգնեն հաջողությամբ դիմակայելու հիվանդություններին ու ծերացման անողոք գործընթացներին:

Շնչառության մասին

Շնչառությունը կառավարելը խիստ անհրաժեշտ է: Շնչառական վարժություններն այսօր առողջարարական մարզումներում լուրջ դեր ունեն, արևելյան բժշկությունը ևս կարևորում է ճիշտ շնչառությունը:

Շնչուղիների վիճակը ստուգելու պարզ թեստ կա. մեջքն ուղղած նստեք, թուլացեք, ապա հավասարաչափ շնչեք 10-20 վայրկյան: Հերթական ներշնչման պահին սեղմեք քիթն ու բերանը և վայրկյանաչափով հետևեք ժամանակին: Փորձեք  հնարավորին երկարչարտաշնչել: Երբեք չի կարելի չափել խորը արտաշնչումից հետո ստեղծված «անշունչ» վայրկյանները:

Գնահատականը՝ ըստ ցուցիչների.

• նորման 60 վրկ է, 50 վրկ-ը շեղում է համարվում,
• 40 վրկ-ը 2-րդ աստիճանի շնչառություն է որակվում,
• 30 վրկ-ը՝ 3-րդ աստիճանի,
• 20 վրկ-ը՝ 4-րդ աստիճանի,
• 5 վրկ-ից ցածրն արդեն «կյանքի ու մահու սահմանագիծ» է համարվում:

Սննդի մասին

Կերեք այն, ինչը ձեզ է դուր գալիս, պարզապես մի մոռացեք լավ ծամելու մասին: Չափավորեք ախորժակը, չափից ավելի պետք է չուտել, և խուսափեք աղի սննդից:

Հեղուկի քանակի մասին

Թվում է, թե դրա մասին ավելորդ է խոսել, քանի որ մեծ քանակությամբ հեղուկի օգուտն ակնհայտ է:

Առաջին. այն հեշտացնում է օրգանիզմից աղերի ավելցուկի դուրսբերումը:

Երկրորդ. երբ շատ հեղուկ ենք գործածում, մեզի մեջ բոլոր նյութերի քանակի խտությունը նվազում է, այն նյութերի, որոնք պետք է դուրս գան օրգանիզմից: Դա նվազեցնում է երիկամներում քարառաջացման վտանգը:

Վերջապես, մեզի հետ օրգանիզմից դուրս են գալիս այն թունավոր նյութերը, որոնք սննդի ու օդի հետ մտնում են օրգանիզմ կամ գոյանում են օրգանիզմում: Իսկ երբ մեզի քանակը շատ է, օրգանիզմն ավելի արագ է մաքրվում:

Իմունիտետի, մրսածության ու մարմինը կոփելու մասին

Կոփվելու մեթոդները հասարակ են. մի՛ փաթաթվիր տաք ծածկոցներով: Դրա փոխարեն արագ շարժվիր, վազիր: Եթե փռշտացիր, մի վախեցիր, կանցնի: Եթե սկսել ես կոփվել, ապա հարբուխի առաջին իսկ նշանների դեպքում` մի հանձնվիր:

Ամենախելացի կոփման եղանակը թեթև հագնվելն է: Իհարկե, կարելի է սառը ցնցուղ ընդունել, շփվել սառը սրբիչով, այդ բոլոր հնարքները ծանոթ են: Բժիշկները նույնը խորհուրդ են տալիս նյարդային համակարգը կոփելու համար:

Կոփումը բարձրացնում է օրգանիզմի՝ մրսածությանը դիմադրելու հատկությունը, հետևաբար, եթե իսկապես չեք կամենում հիվանդանալ, կոփվեք: Ընդ որում, բազում միջոցներ կան՝ սկսած սառը ջրով ցողվելուց մինչև սառցաջրի մեջ ընկղմվելը:

Նյարդային լարվածության մասին

Հոգեկան խառնաշփոթը, գերտաքացումը, օրվա ընթացքում նյարդային համակարգի լարվածությունը վատ երազով են արտահայտվում, բայց, եթե դա ամիսներ է տևում ու շաբաթներ, ապա այլ ախտանշաններ էլ ի հայտ կգան: Դրանք բոլորին են ծանոթ, սակայն սխալ են հասցեագրում ու մեկնաբանում: Երբ ցավում է գլուխը՝ խոսում են գլխի մասին, ցավում է փորը՝ ստամոքսի մասին, փորկապությունն ու փորլուծը` աղիքների, սրտի ցավն ու ծակոցն էլ՝ միայն սրտի խնդիր չեն, էլ չասած արյան բարձր ճնշման մասին: Համենայն դեպս, գոնե սկզբում այդ ամենը «նյարդերից» է, իզուր չեն ասում՝ բոլոր հիվանդությունները նյարդերից են: Ու նյարդերը հանգստացնելու համար մի երեկոն կամ հանգստյան օրը բավարար չէ:

Կարծես թե բոլորս գիտենք դրա մասին, բայց, սովորաբար, հանգստին ժամանակ հատկացնելու առաջարկին արձագանքում ենք` «չի ստացվում»:

Մարդկանց կենսապայմանները տարբեր են լինում: Ոմանք սեփական ժամանակը տնօրինելու հնարավորությունից էլ են զրկված, ու նրանց մնում է դիմանալ, ինչը, ի դեպ, կարող է հանգեցնել կաթվածի: Եթե ձեզ համար աշխատանքը թանկ է, գուցե ինքներդ որոշեք, թե ինչն է ավելի կարևոր:

Եզրակացություն. կյանքի առաջնահերթությունները որոշելիս, հաճախ ենք մոռանում հոգեկան ու լիարժեք հանգստության, առողջ քնի մասին: Սակայն օրգանիզմը, Ամոսովի կարծիքով, նման է ավտոմեքենայի, այն չի կարող անվերջ աշխատել: Վաղ թե ուշ, այդ աշխատանքն ավելի թանկ է մեզ վրա նստում:

Լսենք մեծ մասնագետների խոսքն ու մեր կյանքի ավոտմեքենան հնարավորին երկար ու երջանիկ վարենք:

Հարցեր, պատասխաններ, մեկնաբանություններ