Գիտելիքի և նվիրումի միավորող նախաձեռնություն՝ ի նպաստ Հայաստանի բժշկության զարգացման

Հայաստանի գիտաբժշկական գրադարանում տեղի ունեցավ մասնագիտական գրականության նվիրատվության և բժշկական գիտելիքի հասանելիության ընդլայնմանն ուղղված նոր նախաձեռնությունների ներկայացման հանդիպում։

Հայաստանի գիտաբժշկական գրադարանը հյուրընկալել էր բժշկական հանրության ներկայացուցիչների և բարեկամների, որոնց միավորել էր կարևոր առաքելություն՝ նպաստել Հայաստանում բժշկական կրթության, գիտության և մասնագիտական զարգացմանը։

ՀՕՖ-ի շրջանավարտների միությունը՝ Գևորգ Յաղջյանի, Համբարձում Սիմոնյանի և Արմինե Հակոբյանի համատեղ ջանքերի շնորհիվ Մոսկվայից Հայաստան են բերվել «ԳԷՈՏԱՐ-Մեդիա» հրատարակչության նորագույն բժշկական դասագրքերն ու մասնագիտական աշխատությունները։

Գրքերը գրադարան էին հասել հանդիպումից ընդամենը երկու օր առաջ՝ դառնալով մասնագիտական գրականության ֆոնդի համալրման հերթական արժեքավոր ներդրումը։

Միջոցառման երկրորդ կարևոր առիթը Հայաստանի բժիշկների համար միջազգային ClinicalKey AI գիտաբժշկական հարթակից օգտվելու հնարավորության ստեղծումն էր։ Նախաձեռնության շրջանակում նախատեսվում է գիտաբժշկական գրադարանին տրամադրել հարթակի հասանելիություն, որի շնորհիվ Հայաստանի տարբեր բժշկական հաստատություններում աշխատող մասնագետները կկարողանան օգտվել ժամանակակից գիտական տեղեկատվությունից՝ ինչպես իրենց աշխատավայրերից, այնպես էլ գրադարանից։

Այս նախաձեռնությունը հատկապես կարևոր է բժշկական տեղեկատվության արագ փոփոխվող աշխարհում, որտեղ գիտականորեն հիմնավորված գիտելիքի հասանելիությունը նպաստում է մասնագիտական որոշումների կայացմանը և շարունակական կրթությանը։

Հանդիպման ժամանակ նաև իրենց ընտանիքի անունից Գևորգ Յաղջյանը և Շարոն Չեքիջյանը Առողջապահության ազգային ինստիտուտին նվիրեցին նկարիչ Արարատ Սարգսյանի՝ «Հիպոկրատի երդումը» ստեղծագործությունը։ Նախաձեռնողների համոզմամբ՝ արվեստի այս գործը կարող է դառնալ ԱԱԻ-ում տարբեր միջոցառումների մի մասը՝ դառնալով բժշկի կոչման, մասնագիտական պատասխանատվության և մարդասիրական արժեքների խորհրդանիշ։

«Այսօր փոքր հավաք է, բայց այստեղ են մեր ընկերները, ովքեր ճանաչում են մեզ և ցանկացել են մասնակցել այս առիթին»,– նշեց նախաձեռնության ներկայացուցիչը՝ ընդգծելով հանդիպման բարեկամական և անմիջական բնույթը։

Միջոցառումն ավարտվեց ջերմ մթնոլորտում՝ համախոհների շփումներով և նախաձեռնությունների հետագա զարգացման շուրջ մտքերի փոխանակմամբ։
Այս հանդիպումը ևս մեկ վկայություն էր, որ բժշկության զարգացումը սկսվում է գիտելիքի արժևորումից, այն հասանելի դարձնելու պատրաստակամությունից և մարդկանցից, որոնք իրենց անձնական նախաձեռնությամբ նպաստում են հանրային կարևոր նպատակների իրականացմանը։

Հարցեր, պատասխաններ, մեկնաբանություններ