«Աշխատանքային առողջության պրակտիկա բուժաշխատողների համար» եռօրյա կոնֆերանս

Մայիսի 22-ին Առողջապահության ազգային ինստիտուտում մեկնարկեց «Աշխատանքային առողջության պրակտիկա բուժաշխատողների համար» խորագրով միջազգային եռօրյա կոնֆերանսը, որը համատեղ կազմակերպել են ԱՄՆ «Northwell Health» բժշկական ցանցի Աշխատանքային բժշկության, համաճարակաբանության և կանխարգելման ամբիոնը և ՀՀ ԱՆ «Ակադ. Ս. Ավդալբեկյանի անվան Առողջապահության ազգային ինստիտուտը»։

Կոնֆերանսը միավորել է ոլորտի առաջատար հայաստանյան և միջազգային մասնագետների՝ քննարկելու բուժաշխատողների աշխատանքային առողջությանն ու անվտանգությանն առնչվող արդիական հարցեր։ Երեք օրվա ընթացքում նախատեսված են փորձագետների ելույթներ ԱՄՆ-ից, Հունաստանից և Բելգիայից։ Նրանք կանդրադառնան առողջապահական հաստատություններում առկա մարտահրավերներին, ինչպես նաև աշխատանքային առողջության պահպանման և կանխարգելման արդյունավետ մեթոդներին։

«Northwell Health»-ի ներկայացուցիչ Ջորջ Փիլիգյանը իր ողջույնի խոսքում կարևորեց նման նախաձեռնությունների դերը, ներկայացրեց իր գործընկերներին և միջոցառմանն ցանկացավ հաջող ընթացք։

Իր հերթին, Առողջապահության ազգային ինստիտուտի գիտական գծով տեղակալ Սամսոն Խաչատրյանն իր ելույթում նշեց․

«Սա կարևոր միջոցառում է, որովհետև առաջին անգամ է նման տեսանկյունից կազմակերպվում։ Հույս ունենք՝ այն կդառնա շարունակական։ Բուժաշխատողի աշխատանքային պայմաններն ու առողջությանը սպառնացող վտանգները անմիջականորեն ազդում են նաև պացիենտների առողջության վրա։ Ուրախ եմ տեսնել, որ օրակարգում առաջին թեման վերաբերում է քնի խանգարումների հետ կապված ռիսկերին, ինչը ևս մի ազդակ է, որ ծրագիրը խորքային և արդիական մոտեցմամբ է կազմված»։

Կոնֆերանսի նպատակն է նպաստել ոլորտային լավագույն փորձի փոխանակմանը և խորացնել աշխատանքային միջավայրի անվտանգության մշակույթը։

Հարցեր, պատասխաններ, մեկնաբանություններ