Երևանում կայացավ Հայաստանի սրտաբանների ասոցիացիայի հերթական 13-րդ տարեկան վեհաժողովը

Հուլիսի 8-10-ը Երևանում անցկացվեց Հայաստանի սրտաբանների ասոցիացիայի կողմից կազմակերպվող հերթական 13-րդ վեհաժողովը: Այդ մասին մեզ հետ զրույցում ասել է ԵՊԲՀ N1 համալսարանական կլինիկայի ընդհանուր ինվազիվ սրտաբանության բաժանմունքի ղեկավար, բ.գ.դ., պրոֆեսոր Հմայակ Սիսակյանը։  Նրա խոսքով՝ սրտաբանների տարեկան վեհաժողովը տեղի է ունենում երկու տարին մեկ անգամ։ Դա այն ժամանակահատվածն է, երբ կարիք կա ներկայացնելու ո՛չ միայն կատարած աշխատանքները, հետազոտությունները, այլ նաև իրազեկելու սրտաբան-գործընկերներին ոլորտի նորություններին։

«Սրտաբանությունն արագ զարգացող բժշկական ոլորտներից է, և պետք է հասցնել հետևել աշխարհում տեղի ունեցող նորություններին։ Ձեռքը մշտապես պետք է լինի զարկերակին։ Մեր ասոցիացիան համագործակցում է Եվրոպայի սրտաբանների հետ, և կա հնարավորություն` անցնել երկարատև մասնագիտական վերապատրաստում, ինչպես նաև համատեղ իրականացնել գիտահետազոտական աշխատանքներ, ինչը շատ կարևոր է», - ընդգծել է Հ. Սիսակյանը։

Խոսելով վեհաժողովի մասին՝ Հ. Սիսակյանը նշել է, որ եռօրյա հանդիպման ժամանակ ամփոփել են վերջին երկու տարվա ընթացքում կատարած աշխատանքները։  

«Մենք մի շարք կրթական ծրագրեր ենք իրականացրել՝ դասախոսությունների տեսքով և ո՛չ միայն, ինչի արդյունքում սկսել են կիրառվել նոր մեթոդներ, բուժական նոր մոտեցումներ՝ միջամտական սրտաբանության ոլորտում։ Սա դեռ սերմերն են, որոնք պետք է ծիլ տան ու զարգանան գալիք երկու տարվա ընթացքում։  2019 թվականին ակտիվ քարոզարշավ ենք տարել առողջ ապրելակերպի, ծխախոտի պայքարի, զարկերակային հիպերտենզիայի գործոնների նվազման դեմ ՝ Սրտի համաշխարհային օրվա շրջանակում, և կան լավ արդյունքներ։ Մեր ասոցիացիայի առաքելությունն է՝ կանխարգելել սրտանոթային հիվանդությունները, կրճատել մահվան դեպքերը»։  

«Էրեբունի» ԲԿ սրտաբանական կլինիկայի ղեկավար, ՀՀ ԱՆ սրտաբանության գծով խորհրդատու, բ.գ.դ., պրոֆեսոր Համլետ Հայրապետյանը կարևորել է միջոցառումը, նշելով, որ սրտաբանների հերթական վեհաժողովն այս տարի մի փոքր ուշացումով է կայացել՝ համավարակի պատճառով, և որ այն այս տարի առանձնահատուկ էր. ներկայացվել են հետաքրքիր զեկույցներ։  

«Բոլորս իրականում կարոտել էինք միմյանց։ Վերջապես հաջողվեց վերականգնել գիտական պրակտիկան. ծարավ կար նոր խոսք լսելու։ Հատկապես շատ ուրախացա այն փաստից, որ վեհաժողովին մասնակցեցին սրտաբաններ` ՀՀ մարզերից։ Նրանք հնարավորություն ունեցան նոր գիտելիքներ ձեռք բերելու, և դա շատ կարևոր է. ծանրաբեռնված առօրյան միշտ չէ, որ նման հնարավորություն է ընձեռում»,- ասել է Համլետ Հայրապետյանը։ 

 
Հ. Հայրապետյանն արձանագրել է, որ, այս տարի, ցավոք, համավարակի պատճառով վեհաժողովին խոսնակներ ներգրավել Եվրոպայից չի հաջողվել։  «Նրանք հանդես են եկել ողջույնի խոսքով՝ հեռահար։ Մեկական զեկույցներ հնչել են Ռուսաստանից և Ուկրաինայից ժամանած սրտաբան-գործընկերների կողմից»։  

Նշենք, որ վեհաժողովի ծրագիրը հաստատվել է ՀՀ առողջապահության նախարարի հրամանով, և մասնակիցներին շնորհվել է ՇՄԶ 14 տեսական կրեդիտ, տրվել են նաև վկայականներ:

Հարցեր, պատասխաններ, մեկնաբանություններ