Երևանում կայացավ «Հոգեկան առողջության ոլորտի նորագույն մոտեցումները Հայաստանում» խորագրով հանդիպում

Հոկտեմբերի 4-ին Բեստ Վեստեռն Կոնգրես հյուրանոցի Ball Room հյուրասրահում կայացավ Հոգեկան առողջության միամսյակի շրջանակներում կազմակերպվող «Հոգեկան առողջության ոլորտի նորագույն մոտեցումները Հայաստանում» հանդիպումը:

Միջոցառման ընթացքում ներկայացվեցին հոգեկան առողջության ոլորտում ՀՀ-ում գործող երկու մեծ ծրագրերը` «Սպիտակի խնամքի տունը» և «Ռեքավերի քոլեջը», ինչպես նաև տեղի ունեցավ հոգեկան առողջության խնդիրներ ունեցող անձանց նկարների ցուցահանդես: Բացման խոսքով հանդես եկավ Հայկական hոգեբուժական ասոցիացիայի նախագահ Արմեն Սողոյանը:

Հոգեսոցիալական կարգավորման կենտրոնի հոգեբան, Ռեքավերի Քոլեջի ղեկավար Լիլիթ Բաղդասարյանը մեզ հետ զրույցում ասաց. «Այսօր մենք ներկայացրեցինք Հայաստանում հոգեկան առողջության ոլորտում գործող նորագույն մոդելներից երկուսը` Ռեքավերի Քոլեջն և Սպիտակի խնամքի տունը: Ներկայացրեցինք նաև ցուցահանդես. բոլոր նկարները պատրաստված են այն անձանց կողմից, ովքեր հաղթահարել են հոգեբանական խնդիրներ և ստեղծել որոշակի արվեստի գործեր»:

Խոսելով Ռեքավարի Քոլեջի մասին՝ հոգեբանը նկատեց. «Սա նոր հոգեսոցիալական վերականգման մի եղանակ է, երբ մարդը կարող է իրեն զգալ ոչ թե պացիենտի կարգավիճակում, այլ` ուսանողի, քանի որ նա եկել է սովորելու ու լսելու իր խնդրի մասին դասախոսությունները: Ընդ որում, այստեղ դասավանդում են ո՛չ միայն հոգեկան առողջության ոլորտի մասնագետներ, այլ նաև մարդիկ, ովքեր ունեն հոգեկան առողջության ամենատարբեր խնդիրների հաղթահարման սեփական փորձ»:

Լ. Բաղդասարյանի փոխանցմամբ՝ ունկնդիր կարող են դառնալ և՛ հոգեկան ոլորտի մասնագետները, որպես վերապատրաստում, և՛ հոգեկան առողջության հետ խնդիրներ ունեցող մարդկանց հարազատները, որպեսզի ավելի լավ հասկանան խնդիրը`ինչպես օգնել հարազատին»:

Անդրադառնալով Սպիտակի խնամքի տանը`Լ. Բաղդասարյանն ընդգծեց. «Նոր մոդել է, որը գալիս է փոխարինելու հոգենյարդաբանական ինտերնատները, որտեղ մարդիկ ներգրավված են մեծ քանակությամբ. Սպիտակի խնամքի տունը նախատեսված է 16 հոգու համար: Այն գտնվում է Սպիտակ քաղաքի կենտրոնում: Ունի բաց դռներ: Այս գործունեության հիմնական նպատակը է, որ մարդիկ հասարակության մեջ կարողանան լիարժեք կյանքով ապրել՝ զգալով իրենց հասարակության լիարժեք անդամ»:

Լ. Բաղդասարյանի խոսքով՝  այս ծրագրերին կարող են մասնակցել միայն 18 տարեկանն անց չափահաս մարդիկ, քանի որ հոգեկան առողջության մասին գանգատները սկսում են այդ տարիքից: 

Այս ծրագրերի մեկնարկը բարձր է գնահատում Հայկական հոգեբուժական ասոցիացիայի նախագահ Արմեն Սողոյանը, ով մեզ հետ զրույցում ասաց. «Այսօրվա միջոցառումը մեկն էր հոգեկան առողջության միամսյակի միջոցառումների շարքից, որը հայտարարված էր հայկական հոգեբուժական ասոցիացիայի կողմից: Ու, թեպետ, միջոցառումը նվիրված էր «Ռեքավերի քոլեջի» և «Սպիտակի խնամքի տանը» ծրագրերին, անկախ դրանից, հանդիպումը վերածվեց մեծ հասարակական մասնագիտական քննարկման, որի ընթացքում ներկայացվեցին այլընտրանքային խնամքի ծառայությունները, խնամքի նոր մոդելներն, ինչպես նաև կրթական նոր ծրագրերը»:

Ա. Սողոյանը փաստեց, որ  և՛ մասնակիցները, և՛ մարդիկ, ովքեր առաջին անգամ էին առնչվում նման հարցերի հետ, հեռացան մեծ բավականության զգացումով . «Այս նախաձեռնությունները շատ դրական ընթացք ունեն, ընդ որում, շատ կարևոր է պետություն-հասարակական կազմակերպություն, համայնք-տարածքային կառավարություն, նաև տարբեր միջազգային կազմակերպությունների ներգրավումը. որքան շատ, այնքան ծրագրերը կլինեն շարունակական»: Ա. Սողոյանն ասաց նաև, որ  «Ռեքավերի քոլեջը» երրորդ նստաշրջանն է անցկացնում, և դա ողջունելի է:

Հարցեր, պատասխաններ, մեկնաբանություններ