«Սրտի իշեմիկ հիվանդություն: Սրտային անբավարարություն». Սատելիտային սիմպոզիում՝ 4-րդ միջազգային բժշկական համագումարի շրջանակում

Հայաստանի 4-րդ միջազգային բժշկական համագումարի շրջանակում  կայացան մի շարք սիմպոզիումներ՝ հրավիրված առաջատար մասնագետների մասնակցությամբ:  Boston Scientific  ընկերության հովանավորությամբ կայացավ նաև  «Սրտի իշեմիկ հիվանդություն: Սրտային անբավարարություն» սատելիտային սիմպոզիումը:

Սիմպոզիումը կազմակերպել էր Երևանի պետական բժշկական համալսարանի անհետաձգելի սրտաբանության ամբիոնի վարիչ, համալսարանական թիվ 1 սրտաբանական կլինիկայի ղեկավար բժշկական գիտությունների դոկտոր, պրոֆեսոր Հմայակ Սիսակյանը: 

Պրոֆեսորի նպատակը սիմպոզիումի շրջանակում սրտային այն հիվանդությունների շեշտադրումն էր, որոնց վրա է ընկնում մահացությունների առավել զգալի տոկոսը և որի կանխարգելումն ու ժամանակին իրականացվող բուժումը կտրուկ կարող է փոխել այսօր գոյություն ունեցող պատկերը:

Սիմպոզիումին մասնակցում էին արտասահմանյան կլինիկաների առաջատար հայ մասնագետներ, ինչպես օրինակ,  Մոսկվայի №1 կլինիկական հիվանդանոցի էնդովասկուլյար ծառայության ղեկավար Նարեկ Զաքարյանը:

–   Սրտաբանության ո՞ր թեմաներն են քննարկվել Ձեր զեկույցում:

–   Խոսել ենք սրտամկանի  սուր ինֆարկտի, ինֆարկտի պատճառների, բուժման ժամանակակից մեթոդների, նորագույն ցուցանիշների մասին: Միոկարդի սուր ինֆարկտն ամբողջ աշխարհում առաջինն է մահացության ցուցանիշով:

–   Հնարավո՞ր է բուժել, կանխարգելել սրտամկանի ինֆարկտը:

–   Այո՛, իհարկե՛:  Այսօր նորագույն տեխնոլոգիաները թույլ են տալիս ամբողջությամբ բուժել այս հիվանդությունը, եթե միջամտություններն իրականացվեն ժամանակին  և օպերատիվ: Էնդովասկուլյար վիրաբուժության տեխնոլոգիաները թույլ են տալիս շատ կարճ ժամանակահատվածում  լուծել բոլոր խնդիրները, ստենտավորման և այլ միջոցներով: Երբ անոթը փակվում է, արյան շրջանառությունն այդ տարածքում դադարում է՝ առաջ բերելով սրտամկանի ինֆարկտ: Էնդովասկուլյար վիրաբուժությունը թույլ է տալիս շատ կարճ ժամանակում վերացնել թրոմբները, հանգույցները և վերականգնել արյան շրջանառությունը:

–   Էնդովասկուլյար վիրաբուժության մեթոդը կիրառվում է նաև Հայաստանում…

-Այո՛, Հայաստանում այդ տեխնոլոգիան ներդրված է: Շատ կլինիկաներ ունեն համապատասխան տեխնիկա, որակավորված մասնագետներ, որպեսզի փրկեն հիվանդին միոկարդի սուր ինֆարկտից: Խնդիրը մեկն է՝ ինչպես քանակից ուշադրությունը սևեռել որակի վրա: Սա ո՛չ միան առողջապահական, այլև սոցիալական խնդիր է:

–   Ո՞ր թեմաներն են հետարքրում Ձեզ այս սիմպոզիումի շրջանակում:

–   Այստեղ բոլոր թեմաներն են հետաքրքիր: Ինձ մասնավորապես գրավեցին սիրտ-անոթային վիրաբուժության մասին  ելույթները, կաթվածը, գանգրենան:

–   Ի՞նչ եք կարծում՝ պրակտիկապես այն բժշկին կօգնի՞ իր առօրյա աշխատանքում:

–   Ամբողջ աշխարհից այստեղ են հավաքվել առաջատար մասնագետներ և մենք լսեցինք միայն որակյալ ելույթներ՝ ժամանակակից, գործնականում կիրառելի մեթոդների մասին: Հենց դրանք վաղը պետք է կիրառվեն նաև հայ բժշկի առօրյա աշխատանքում: Շատ հաճելի է, որ դահլիճը լիքն էր, ուրեմն իսկապես հետաքրքիր են նյութերը:

Մեր հաջորդ զրուցակիցը Բուլղարիայի սրտաբանների ասոցիացիայի  նախագահ պրոֆեսոր Վասիլ Վելչևն է:

–   Պրոֆեսոր Վելչև, ի՞նչ թեմա եք առանձնացրել հայ սրտաբանների համար:

–   Իմ թեման  միոկարդի ինֆարկտին ոչ սովորական մոտեցման մասին էր: Արդո՞ք միշտ է պետք ստենտավորել STEMI-ով հիվանդներին: Իրականում՝ ո՛չ: Հատկապես կարևորել եմ երիտասարդների մոտ բազմաթիվ թրոմբների առկայության դեպքում ժամանակակից մոտեցումները: Լինում են նաև դեպքեր, երբ պարզապես հնարավոր չէ ստենտավորել:

–   Հայաստանում բավականին արդյունավետ գործում է Stents for Life ծրագիրը, կա՞ որևէ վիճակագրություն այս ծրագրի կիրառման հետ կապված:

–   Stents for Life  ծրագրին Բուլղիարիայում մենք  միացանք 2008 թվականին: Մինչ այդ սրտամկանի ինֆարկտից առաջացող մահացության ցուցանիշը 7.5 էր, հիմա այն 4 է: Այս 7 տարիների ընթացքում մենք կարողացանք 3.5 -ով իջեցնել մահացության ցուցանիշը: Ցավոք, մեր  պացիենտների 20%-ը 45-ից ցածր տարիքային խմբի մարդիկ են:

–   Արդեն մի քանի օր է, ինչ Հայաստանում եք, հասցրե՞լ եք, թեկուզ մակերեսային, ուսումնասիրել Հայաստանի սրտաբանությունը, զարգացման միտումներն ու թերացումները:

–   Ես առաջին անգամ եմ Հայաստանում, հայերեն էլ, ցավոք,  չգիտեմ, բայց ինչպես հասկանում եմ, այստեղ շատ արագ փորձում են զարգացնել անգիոպլաստիկան, ինչն, իհարկե՛, հրաշալի է՝ հատկապես սրտաբաններիս համար:

Մեր հաջորդ զրուցակիցը սատելիտային սիմպոզիումի հովանավոր Boston Scientific ընկերության մենեջեր Դանիլ Պետրովն է:

–    Ներկայացրեք, խնդրե՛մ, Boston Scientific ընկերությունը:

–   Ընկերությունը բժշկական տեխնիկայի առաջատար արտադրող է: Բժշկական պարագաներ ու տեխնիկա ենք ներկայացնում ամենատարբեր ոլորտներում՝  նյարդավիրաբուժություն, վիրաբուժություն, ուռուցքաբանություն, էնդոսկոպիա, ուրոլոգիա, գինեկոլոգիա և այլն:

–   Որտեղի՞ց է սկսվում պատմությունը...

Մեր ինովացիոն ճանապարհը սկսվել է դեռ 1979 թվականից, երբ մեր  ստերիլ կատետերներն առաջին անգամ կիրառվեցին քիչ ինվազիվ գործընթացում:  Ընկերությունը հիմնադվել է Ջոն Աբելի կողմից: Այն շատ արագ մեծ մասսայականություն ձեռք բերեց, քանի որ արտադրման հիմքում դրված էր գիտական մոտեցումը:

–   Ձեր քաղաքականության մի մասը նաև սիմպոզիումներին, տարբեր կոնֆերանսներին աջակցելն է:

–   Մեր գործընկեր Կոնցեռն Էներգոմաշի հետ մենք այսօր հովանավորում ենք 4-րդ միջազգային բժշկական համագումարի շրջանակում իրականացվող սիմպոզիումը: Մեր քաղաքականությունը ենթադրում է ո՛չ միայն վաճառք, այլև մասնագետներին աջակցություն, բժշկության մակարդակի բարձրացում: Այսօրվա միջոցառումը, միանշանակ, նպաստելու է սրտաբանության ոլորտի զարգացմանը, այդ պատճառով մենք դրա մի մասնիկը դարձանք:

Հարցեր, պատասխաններ, մեկնաբանություններ