Ալ. Սպենդիարյանի անվան օպերայի և բալետի ազգային ակադեմիական թատրոնում հուլիսի 1-ին տեղի ունեցավ Հայաստանի 4-րդ միջազգային բժշկական համագումարի բացման պաշտոնական արարողությունը

Հուլիսի 2-4-ը Երևանում ընթացող համագումարին մասնակցում են աշխարհահռչակ հայ բժիշկներ, միջազգային ճանաչում ունեցող հայ փորձագետներ, առողջապահության ոլորտի մասնագետներ, բուժքույրեր: Հայաստանի 4-րդ միջազգային բժշկական համագումարը նվիրվում է Հայոց ցեղասպանության 100-րդ տարելիցին և կրում է «Միասին՝ հանուն ազգի առողջության» խորագիրը:

Հայաստանի առողջապահության նախարարության և ՀՀ առաջին տիկին Ռիտա Սարգսյանի բարձր հովանու ներքո կազմակերպվող 4-րդ համագումարի շրջանակներում աշխարհի տարբեր ծայրերից ժամանած բանախոսները և մասնակիցները կանդրադառնան առողջապահության ոլորտի արդի հիմնախնդիրներին,  ձեռքբերումներին, կկատարեն փորձի փոխանակում:

Մեդ-Պրակտիկը զրուցեց 4-րդ ՀԲՀՄ նախագահ պրոֆեսոր Արա Բաբլոյանի հետ:

–   Պարո՛ն Բաբլոյան, երկար և հանգամանալից պատրաստվում էիք համագումարին. գո՞հ եք այն արդյունքից, որն այսօր տեսնում եք:

–   Շատ գոհ ենք, շատ հուզված, որ այսքա՜ն մասնակիցներ կան, մեծ ակտիվություն: Մենք սպասում էինք, որ շատ մասնակիցներ կլինեն աշխարհի տարբեր երկրներից, բայց ոչ այսքան...

–   Քանի՞ երկրից հյուրեր ունենք:

–   Աշխարհի 18 երկրներից են եկել: Շուրջ 250-ական մասնակիցներ ունենք՝ Հայաստանից և արտասահմանից, 500 բժիշկ. դեռ շարունակվում են գրանցումները: Աննախադեպ մեծ թիվ է:

–   Ի՞նչ է նախատեսվում ծրագրում:

–   Տարբեր ուղղություններով են աշխատանքներն ընթանալու. շեշտադրվելու են հատկապես հանրային առողջությունը, մոր և մանկան առողջությունը, սրտանոթային հիվանդությունները, արյունաբանությունը և այլն…

Հայ բժիշկների միջազգային 4-րդ համագումարին ուղերձ էր հղել ՀՀ նախագահ Սերժ Սարգսյանը, որն ընթերցեց Աշխատանքի և սոցիալական հարցերի նախարար Արտեմ Ասատրյանը:

Հայաստանի և Սփյուռքի հայ բժիշկներին ուղղված՝ Ամենայն Հայոց Կաթողիկոս Գարեգին Բ-ի խոսքն ընթերցեց Տաթև արքեպիսկոպոս Սարգսյանը:

Բացման արարողության ժամանակ ՀՀ առողջապահության նախարար Արմեն Մուրադյանը նշեց, որ համագումարը հիանալի առիթ է՝ ամփոփելու բժշկության ոլորտում կատարված աշխատանքները,  ծրագրային մոտեցումները: Նա ներկայացրեց վերջին շրջանում իրականացված մի շարք կարևորագույն ծրագրերի ընթացքն ու արդյունքները: Նախարարը նաև շնորհավորեց ներկաներին Բուժաշխատողի օրվա կապակցությամբ՝ հղելով բարեմաղթանքներ:

Մոսկվայից ժամանած աշխարհահռչակ հայ սրտաբան, ՌԴ բժշկագիտության ակադեմիայի Ա. Բակուլևի անվան սիրտ-անոթային վիրաբուժության գիտական կենտրոնի ռենտգենոներանոթային ախտորոշման և բուժման բաժնի ղեկավար, ՌԴ առողջապահության նախարարության ռենտգենոներանոթային ախտորոշման և բուժման գծով գլխավոր մասնագետ Բագրատ Ալեքյանը լրագրողների հետ զրույցում մեծապես կարևորեց չորս տարին մեկ անգամ Հայ բժիշկների միջազգային համագումարի անցկացումը: «Կարծում եմ՝ աշխարհի տարբեր ծայրերից հայ բժիշկները ժամանում են ամենաթարմ տեղեկատվությամբ և փորձի փոխանակում են կատարում գործընկերների հետ: Քննարկվում են բժշկության ոլորտի ամենատարբեր խնդիրները, որոնցից շատերը նաև լուծումներ են ստանում: Շատ կարևոր է նաև, որ բոլորս համախմբվում ենք համայն հայության սրտում՝ Երևանում: Մենք Ռուսաստանից ժամանել ենք բավականին մեծ թիմով»,- նշեց պարոն Ալեքյանը:

Հայ բժշկական միջազային կոմիտեի (AMIC) նախագահ Ջերրի Մանուկյանը ևս, լրագրողների հետ զրույցում կարևորելով համագումարը, հավելեց, որ այն մեծ դեր ունի Հայաստան-Սփյուռք կապերն ամրապնդելու տեսանկյունից: «Այս դեմ առ դեմ հանդիպումը թույլ է տալիս գնահատել, թե ինչ ռեսուրսներ ունենք և ինչ ուղղությամբ ենք շարժվում, ինչպես նաև՝ որտեղ ունենք բարեփոխումների կարիք»,- նկատեց նա:

Հայաստանի 4-րդ միջազգային բժշկական համագումարի բացման արարողության պաշտոնական հատվածին հաջորդեց համերգային ծրագիր՝ Հայաստանի պետական երիտասարդական նվագախմբի մասնակցությամբ (գեղարվեստական ղեկավար և գլխավոր դիրիժոր՝ Սերգեյ Սմբատյան):

Համագումարին զուգահեռ՝ հուլիսի 1-4-ը, Երևանում կկազմակերպվեն նաև 17 սատելիտային սիմպոզիումներ, որոնք թույլ կտան ավելի խորքային և հիմնավոր անդրադառնալ առանձին ոլորտների խնդիրներին և նվաճումներին:

Հարցեր, պատասխաններ, մեկնաբանություններ