Վեր հանվեցին խնդնիրներն ու դրանց լուծման ուղիները. Դ. Դումանյանն այցելեց Մաշկաբանության և սեռավարակաբանության բժշկագիտական կենտրոն

ՀՀ առողջապահության նախարար Դերենիկ Դումանյանն այցելեց Մաշկաբանության և սեռավարակաբանության բժշկագիտական կենտրոն, ուր նախ ծանոթացավ առկա հնարավորություններին և իրականացվող ծառայությունների ծավալներին։

Հանրապետությունում մասնագիտական միակ կենտրոնում իրականացվում են ինչպես հիվանդանոցային, այնպես էլ` ամբուլատոր-պոլիկլինիկական և խորհրդատվական ծառայություններ, դիսպանսեր հսկողություն։ Այստեղ են կենտրոնանում և վերլուծվում մարզերի համանման ծառայությունների հաշվետվությունները։ Կենտրոնը նաև բժշկական բուհերի և քոլեջների կլինիկական բազան է, որտեղ մասնագիտանում է մոտ 5000 ուսանող։

Այնուհետև բուժանձնակազմի հետ ունեցած հանդիպման ժամանակ քննարկվեցին առկա խնդիրներն ու զարգացման հնարավոր ուղիները։  Մասնագետներն իրենց անհանգստությունն արտահայտեցին այն առթիվ, որ մայրաքաղաքի շատ կաբինետներում սեռավարակների ու մաշկային հիվանդությունների բուժում իրականացվում է առանց պատշաճ վերահսկողության, ինչի պատճառով սխալ ախտորոշման ու բուժման արդյունքում երբեմն հիվանդները մասնագիտական կենտրոն են դիմում հիվանդության բարդացված վիճակում։ Դժգոհություններ հնչեցին լաբորատորիաներում օգտագործվող ռեակտիվների որակից, առանձին ծառայությունների ոչ բավարար ֆինանսավորման առթիվ։
Դերենիկ Դումանյանը կենտրոնի ղեկավարության ուշադրությունը հրավիրեց այն հանգամանքի վրա, որ ի տարբերություն այլ բուժհաստատությունների, այստեղ ներդրված համավճարի համակարգը ֆինանսական սպասված մուտքեր չի ապահովել, կենտրոնում ցածր են բժիշկների և բուժքույրերի միջին աշխատավարձերը, թույլ է կապը մարզերի համանման ծառայությունների հետ։ Նախարարը հանձնարարեց կենտրոնի ֆինանսական առողջացման ծրագիր մշակել, ինչպես նաև մարզերում գլխավոր մասնագետների ինստիտուտ ստեղծել և սերտորեն համագործակցել նրանց հետ։ Կենտրոնի տնօրեն Կարեն Բաբայանին հանձնարարեց որպես նախարարության գլխավոր մասնագետ ընդգրկվել բուժման ուղեցույցների և չափորոշիչների մշակման գործում։ Առաջարկեց խմբեր ստեղծել և ուսումնասիրել ինչպես Երևանի տարբեր կաբինետներում, այնպես էլ մարզերում այս ոլորտում իրականացվող ծառայությունների որակը։ Դերենիկ Դումանյանը միաժամանակ խոստացավ ընթացք տալ նախարարության իրավասությամբ լուծվող խնդիրներին, մասնավորապես` հանձնարարել մեխանիզմներ մշակել ինչպես լաբորատորիաներ-կենտրոն կապի, ռեակտիվների որակի նկատմամբ հսկողության ապահովման, այնպես էլ` կենտրոնի ֆինանսավորման որոշ դրույթների վերանայման ուղղությամբ։

Դերենիկ Դումանյանն այցելեց նաև Ճառագայթային բժշկության և այրվածքների գիտական կենտրոն։ Այստեղ է իրականացվում Չեռնոբիլի վթարի վերացման աշխատանքների մասնակիցների բուժումն ու դիսպանսեր հսկողությունը։ Ի դեպ, նրանք նախարարին իրենց գոհունակությունը հայտնեցին թե բուժման որակի, թե բուժանձնակազմի հոգատար վերաբերմունքի առթիվ։ Նախարարն այցելեց նաև այրվածքային բաժանմունքի հիվանդասենյակներ, ծանոթացավ կենտրոնի նոր սարքավորումների հնարավորություններին։

Կենտրոնում կարողացել են խնայված միջոցների հաշվին վերանորոգել բաժանմունքները, վերջին սերնդի որոշ սարքավորումներ ձեռք բերել։ Իսկ համավճարի ներդրման շնորհիվ զգալի բարձրացել է բժիշկների աշխատավարձը։  

Հարցեր, պատասխաններ, մեկնաբանություններ