ՌԴ ԿԳ-ն կկիրառի Հայաստանի փորձը երեխաների և դեռահասների շրջանում ՄԻԱՎ-ՁԻԱՀ-ի դեմ պայքարում

Հայաստանը շոշափելի հաջողությունների է հասել երեխաների և երիտասարդների շրջանում ՄԻԱՎ/ՁԻԱՀ-ի դեմ պայքարում, և Ռուսաստանի կրթության նախարարությունը կկիրառի Հայաստանի փորձը, ասաց ՌԴ կրթության և գիտության նախարարության Երեխաների դաստիարակության և սոցիալականացման դեպարտամենտի բաժնի պետի տեղակալ Անդրեյ Գերիշը Երևանում ՄԻԱՎ/ՁԻԱՀ-ի խնդրին նվիրված սեմինարում։  

«ՄԻԱՎ-ի խնդիրն այսօր ծայրաստիճան արդիական է Ռուսաստանում։ Մենք 575 հազար ՄԻԱՎ-վարակակիր ունենք, ընդ որում ոչ պաշտոնական տվյալներով այդ թիվը մոտենում է միլիոնի»,- ասաց Գերիշը։

Նրա խոսքերով` ավելի բարձր տոկոս են սկսում կազմել այդ թվում վերարտադրողական տարիքի կանայք, ովքեր վիրուսն իրենց երեխաներին են փոխանցում։

«Մեր պետությունն ակտիվորեն պայքարում է այդ խնդրի դեմ, և մենք փորձի փոխանակման հույս ունենք մեր հայ գործընկերների հետ։ Մասնավորապես, մարտի 18-19-ին Աստանայում կկայանա միջազգային համաժողով, որին կմասնակցեն և Հայաստանը, և Ռուսաստանը»,- նշեց Ռուսաստանի կրթության և գիտության նախախարության ներկայացուցիչը։

Հայաստանում փետրվարի մեկի դրությամբ արձանագրվել է ՄԻԱՎ վարակման 827 դեպք, որոնցից 17-ը՝ մինչև 15 տարեկան երեխաներ։ ՁԻԱՀ-ով հիվանդների թիվը երկրում կազմում է 2300 մարդ։

«Հայաստանի փորձը ՄԻԱՎ-վարակի և ՄԻԱՎ-դրական մարդկանց նկատմամբ հանդուրժողական վերաբերմունքի ձևավորման բանգավառում կրթության և ռիսկային խմբերի հետ աշխատանքների միջոցով» երկօրյա սեմինարն է մեկնարկել ուրբաթ Ռուս-Հայկական (Սլավոնական) համալսարանում։ Սեմինարին մասնակցում են 25 ռուս և հայ մասնագետներ։

Հարցեր, պատասխաններ, մեկնաբանություններ