Նպատակ. Բարձրացնել երեխաների հիվանդանոցային օգնության մատչելիությունն ու որակը

Առողջապահության նախարարությունն ու «Վորլդ Վիժն» կազմակերպությունը լրագրողների համար «Երեխայի առողջության պահպանման հարցերին նվիրված» երկօրյա սեմինար է կազմակերպել Ծաղկաձորում:
Ինչպես սեմինարի ընթացքում ասաց «Վորլդ Վիժն» կազմակերպության ներկայացուցիչ Նաիրա Ղարախանյանը, դասընթացի նպատակն է բարձրացնել ԶԼՄ-ների ներկայացուցիչների իրազեկվածությունը առողջապահության ոլորտում, մասնավորապես, երեխայի արողջության պահպանման ոլորտում իրականացվող բարեփոխումների վերաբերյալ:

Սեմինարի ընթացքում մասնագետներն անդրադարնալու են երեխայի առողջության պետական հավաստագրի, առողջապահության ոլորտում համավճարի ներդրման խնդիրներին:

Առողջապահության նախարարության Մոր և մանկան առողջության պահպանման բաժնի գլխավոռ մասնագետ Գայանե Ավագյանը խոսեց Երեխայի առողջության պետական հավաստագրից: Ըստ նրա, զրոյից յոթ տարեկան երեխաների հավաստագրերի համակարգը ներդրվել է այս տարվա հունվարի մեկից` նպատակ ունենալով բարձրացնել երեխաների հիվանդանոցային օգնության մատչելիությունն ու որակը և կրճատել մանկական մահացության ցուցանիշը:

Մասնագետը նշեց, որ հավաստագրի ներդրման երաշխիք է բյուջեում նախատեսված լրացուցիչ 3.13 միլիարդ դրամը:
Նշենք, որ ծառայությունները ներառում են մինչև յոթ տարեկան երեխաների հիվանդանոցային բուժօգնության ապահովումը` անկախ նրանց սոցիալական վիճակից, 7-18 տարեկան սոցիալապես անապահով և հատուկ խմբերում ընդգրված երեխաների բուժօգնությունը և մինչև 18 տարեկան երեխաների անհետաձգելի բուժօգնությունը:

Հարցեր, պատասխաններ, մեկնաբանություններ