Քուշկյան. «Արյունաբանության զարգացման ծրագիրը նախագահ Սարգսյանը հավանության է արժանացրել»

Այսօր` անվարձահատույց դոնորների միջազգային օրվա կապակցությամբ, Հայաստանի երիտասարդական հիմնադրամի հետ համատեղ, կազմակերպվել է «Նոր արյուն աշխարհին» խորագրով միջոցառում:

Միջոցառման շրջանակներում լրագրողների հետ հանդիպման ժամանակ առողջապահության նախարար Հարություն Քուշկյանը նշեց, որ հանրապետության նախագահ Սերժ Սարգսյանին է ներկայացրել արյունաբանության զարգացման ծրագիրը, որը հավանության է արժանացել: Բացի այդ` նախարարը նկատեց, որ ծրագրի համաձայն` ոսկրածուծի և ցողունային բջիջների փոխպատվաստումը կատարվելու է Ռ. Յոլյանի անվան արյունաբանական կենտրոնում:

Հ. Քուշկյանն ասաց նաև, որ գործող տարբեր ֆոնդերի` այդ թվում Ոսկրածուծի դոնորների հայկական ռեեստրի գործունեությունը պետք է համահունչ լինի առողջապահության նախարարության որդեգրած քաղաքականությանը, որն ուղղորդվելու է բացառապես նախարարության կողմից: Նշենք, որ արյան բաղադրամասերի և պատրաստուկների պահանջարկն ապահովելու համար անհրաժեշտ է, որ բնակչության 2 % արյուն հանձնի: Հայաստանում այդ թիվը կազմում է 0.4 %:

Ամերիկայի և Եվրոպայի, ինչպես նաև` աշխարհի որոշ զարգացող երկրներում, արյունը հավաքագրվում է միայն կամավոր, անվարձահատույց դոնորներից: Հայաստանն այն երկրների շարքում է, որտեղ արյունը հավաքագրվում է ինչպես անվարձահատույց, այնպես էլ փոխհատուցվող դոնորներից:

Հայաստանում անվարձահատույց դոնորները կազմում են արյան դոնորների ընդամենը 5 %-ը: Ի դեպ, միջոցառման վերջում «Նոր արյուն աշխարհին» ծրագրի շրջանակներում պարգևատրվել են կամավոր դոնորները, ովքեր վերջին տարիների ընթացքում անվարձահատույց արյուն են հանձնել, նաև աջակից կազմակերպությունները:

Հարցեր, պատասխաններ, մեկնաբանություններ