Հուլիսի 1-ին կկիրառվի համավճարի ներդրման ծրագիրը. Առաջինը «Արաբկիր» ԲԿ-ն է

Հուլիսի 1-ից հանրապետությունում կկիրառվի առողջապահական ոլորտում համավճարի ներդրման պիլոտային ծրագիրը: Առաջինը այն կգործի «Արաբկիր» բժշկական կենտրոնում:

Այս մասին այսօր լրագրողների հետ հանդիպման ժամանակ ասաց ԱՆ պետական առողջապահության գործակալության պետ Արա Տեր- Գրիգորյանը: «Երկար ժամանակ խոսվում էր այն մասին, որ առողջապահական ծառայությունները չեն վճարվում իրենց իրական արժեքով, սա էր պատճառը, որ նախարարությունը դեռևս 2008 թվականից ուսումնասիրություններ սկսեց համավճարի կիրառման համար: Սա շատ ճկուն ու աշխարհի խոշոր երկրներում գործող ծրագիր է»,-ասաց նա:

Ա. Տեր-Գրիգորյանը նշեց, որ համավճարը սկզբում կգործի տեխնիկապես հագեցվածության առումով առավել հարմար «Արաբկիր» ԲԿ-ում, ապա նպատակ կա այն իրականացնել «Էրեբունի», «Սրբ. Գրիգոր Լուսավորիչ» և «Արմենիա» ԲԿ-ներում: Ինչ վերաբերում է մարզերի կլինիկաներին համավճարի կարգի գործելուն, նա նշեց, որ համակարգի լավ ու վատ կողմերը փորձնականորեն ուսումնսիրելուց հետո միայն կներդրվի:

Բանախոսի մեկնաբանությամբ, համավճարը ենթադրում է համակարգ, որտեղ կա ծառայությունների իրական արժեք, կա պետության կողմից վճարվող մաս, և կա այս երկուսի տարբերությունը: «Ահա, բնակչի կողմից վճարվելու է այդ տարբերությունը:

Բոլոր գները համաձայնեցվելու են բուժհաստատություն, առողջապահության ու ֆինանսների նախարարությունների միջև, պատերի վրա պաստառներին գրվելու են ծառայությունների իրական արժեքները և լինելու են պետություան ու բնակչի կողմից վճարվող մասերը»,-ասաց նա ու ավելացրեց, որ նախարարությունը առաջարկել է բուժհիմնարկին խմբավորել ծառայությունները` կազմել կլինիկածախսային խմբեր ու դրանց մեջ կիրառել միջինացված գին` մեկ թիվ համավճարի համար:

Ասուլիսին ներկա ԱՆ բուժօգնության վարչության պետ Վահան Պողոսյանն իր հերթին նշեց, որ համավճարի ներդրումը ծննդօգնության վրա չի ազդելու:

«Ինչպես ներկայում, այնպես էլ հետո ծննդօգնությունը հնարապետությունում լինելու է անվճար, համենայնդեպս, այնքան ժամանակ»,- նշեց բանախոսը,-«մինչև հանրապետությունում ծնելիության մակարդակը չհասնի բավարար չափանիշի: Վերջում բանախոսները ասացին, որ այս համակարգի անցումը կբերի ստվերային գումարի լեգալացմանը:

Այն հիվանդանոցներում, որտեղ կներդրվի համավճարի համակարգը բոլոր գումարները կմուտքագրվեն դրամարկղ:

Հարցեր, պատասխաններ, մեկնաբանություններ