Ուրոլոգների ասոցիացիայի նախագահին պարգևատրել է ԱԺ նախագահը

Ազգային ժողովի Ոսկեզօծ դահլիճում այսօր ՀՀ ԱԺ Պատվո մեդալով պարգևատրվեց Հայաստանի բժշկական և վիրաբուժական ակադեմիայի իսկական անդամ, ՀՀ առողջապահության նախարարարության առողջապահության գիտահետազոտական ինստիտուտի ուռոլոգիայի ամբիոնի վարիչ, ուռոլոգների հայկական ասոցիացիայի նախագահ, պրոֆեսոր Իվան Աղաջանյանը։

ԱԺ հասարակայնության հետ կապերի վարչության հաղորդմամբ, հանձնելով պարգևը` ՀՀ ԱԺ նախագահ Հովիկ Աբրահամյանը նշեց, որ այն պրոֆեսոր Աղաջանյանին տրվում է ի գնահատումն առողջապահության ոլորտում բազմամյա բժշկական և գիտամանկավարժական նրա գործունեության, ինչպես նաև Հայաստանում ժամանակակից ուռոլոգիայի ներդրման և զարգացման գործում իր հայրենանվեր ծառայության համար։ Խորհրդարանի ղեկավարը, բարձր գնահատելով Իվան Աղաջանյանի ավանդը, մաղթեց բժշկագիտության այս ականավոր գործչին քաջառողջություն, նորանոր հաջողություններ և ձեռքբերումներ։

Ակադեմիկոս Իվան Աղաջանյանը, շնորհակալություն հայտնելով պարգևտրման համար, բարձր գնահատեց Հայաստանի օրենսդիր իշխանության դերը առողջպահության ոլորտի բարեփոխումների և կատարելագործման աշխատանքներում։ Նա նշեց, որ իրեն հանձնված ԱԺ Պատվո մեդալը ոչ միայն իր, այլև Հայաստանում ուռոլոգիայի բնագավառում ներգրավված բոլոր մարդկանց ձեռքբերումն է։

Պարգևատրման հանդիսավոր արարողությանը նաև ներկա էին ԱԺ նախագահի տեղակալներ Սամվել Նիկոյանը և Արևիկ Պետրոսյանը, խորհրդարանի մշտական հանձնաժողովների և խմբակցությունների ղեկավարները, պատգամավորներ, առողջապահության նախարար Հարություն Քուշկյանը, առողջապահության ոլորտի ներկայացուցիչներ։

Հարցեր, պատասխաններ, մեկնաբանություններ