Առողջարանային համալիր Ջերմուկում. նախագահը ծանոթացել է ծրագրերին

Նախագահ Սերժ Սարգսյանն օգոստոսի 8-9-ը աշխատանքային այցով եղել է Ջերմուկում։ Ինչպես հաղորդում են ՀՀ նախագահի մամուլի ծառայությունից, նախագահը մարզի և քաղաքի ղեկավարների հետ քննարկել է անցյալ տարի Ջերմուկի` որպես առողջարանային և զբոսաշրջական կենտրոն զարգացման ծրագրերին նվիրված խորհրդակցությունների ժամանակ տրված հանձնարարականների կատարման ընթացքը։ Մասնավորապես, ՀՀ քաղաքաշինության փոխնախարար, գլխավոր ճարտարապետ Նարեկ Սարգսյանը երկրի ղեկավարին ներկայացրել է Ջերմուկի չգործող օդանավակայանի տարածքում նախատեսված առաջնահերթ կառուցապատման սխեմաների և քաղաքում առողջարանային SPA կենտրոնով հյուրանոցային համալիրի կառուցման նախագծերը։

Չգործող օդանավակայանի և դրան հարակից 120 հա տարածքում նախատեսվում է կառուցել հանգստի և զվարճանքի, զբոսաշրջային, հյուրանոցային, վարչական, բնակելի, խառը կառուցապատման, մշակութային (ներառյալ` շախմատի կենտրոնի և ձմեռային սպորտաձևերի մարզադաշտերի) գոտիներ։ Այս նախագիծը մշակվում է ՀՀ կառավարության 2008թ. սեպտեմբերի 18-ի որոշման հիման վրա, որով ծրագրվում է Ջերմուկը դարձնել առողջարանային, ձմեռային և մշակութային զբոսաշրջության, շախմատի միջազգային մրցաշարերի կազմակերպման կենտրոն, նաեւ` համահայկական ու միջազգային մանկապատանեկան ու երիտասարդական ճամբարատեղի։ Նախագծի մշակման աշխատանքները կավարտվեն այս տարվա սեպտեմբերին։

Գլխավոր ճարտարապետը Սերժ Սարգսյանին տեղեկացրել է, որ առողջարանային SPA կենտրոնով հյուրանոցային համալիրի շինարարությունը սկսված է և կավարտվի 2011թ.։ Համալիրի ներդրումների ծավալը կազմում է 15 մլն ԱՄՆ դոլար։

Այցի ընթացքում, մասնավորապես, Սերժ Սարգսյանն այցելել է նաև Ջերմուկի ճոպանուղի, ծանոթացել տարածքի բարեկարգման աշխատանքներին։ Նախագահ Սարգսյանը ՖԻԴԵ-ի "Գրան Պրի" Ջերմուկ-2009 միջազգային մրցաշարի բացման առիթով Ջերմուկում գտնվող ՖԻԴԵ-ի նախագահ Կիրսան Իլյումժինովի ընկերակցությամբ փորձարկել է ճոպանուղու երթուղին։

Հարցեր, պատասխաններ, մեկնաբանություններ