Հայաստանում Առողջության համաշխարհային օրը նվիրված է քաղաքներում առողջ կենսակերպի խնդրին

Հայաստանում Առողջության համաշխարհային օրը՝ «1000 քաղաք՝ 1000 կյանք» կարգախոսով, նվիրված է քաղաքներում կենսակերպի որակի բարելավմանը, չորեքշաբթի մամուլի ասուլիսի ընթացքում հայտարարեց Միավորված Ազգերի Կազմակերպության (ՄԱԿ) մշտական համակարգող Դաֆինա Գերչևան։

Առողջության համաշխարհային օրը նշվում է ամեն տարի ապրիլի 7-ին՝ սկսած 1950 թվականից։ Այդ օրը 1948 թվականին ուժի մեջ է մտել Առողջության համաշխարհային կազմակերպության (ԱՀԿ) կանոնադրությունը։

«Ձեզանից ոմանք կարող են հարց տալ, թե ինչու՞ ՄԱԿ-ը և Առողջության համաշխարհային կազմակերպությունը որոշեցին այս տարի առողջության համաշխարհային օրը նվիրել կենսակերպի որակի բարելավմանը քաղաքներում։ Պատճառը կտրուկ ուրբանիզացումն է, որը տեղ է գտել վերջին 30 տարիների ընթացքում, ինչի արդյունքում աշխարհի բնակչության ավելի քան կեսն ապրում է քաղաքներում»,- ասաց Գերչևան։

ԱՀԿ տվյալների համաձայն, այսօր Հայաստանի բնակչության 64 տոկոսն ապրում է մայրաքաղաքում, մինչդեռ 1926 թվականին այդ թիվը կազմում էր 19 տոկոս, իսկ 1999 թվականին՝ 65 տոկոս։ ՄԱԿ-ի մշտական համակարգողի կարծիքով, այսօր քաղաքակենտրոնացման հետևանք են հանդիսանում քաղաքներում առողջ կենսակերպի խնդիրներին վերաբերող մի շարք մարտահրավերներ, որոնք կարող են կապված լինել խմելու ջրի որակի, սանիտարական պայմանների հետ։

Այդ կապակցությամբ Առողջապահության համաշխարհային կազմակերպության հայկական գրասենյակի ղեկավար Էլիզաբեթ Դանիելյանը նշեց, որ այս տարի նշվող Առողջության միջազգային օրը պետք է դառնա առողջության պահպանմանը նվիրված հարցերի ավելի ընդլայնված վերահսկողության գործընթացի սկիզբ կամ խորհրդանիշ՝ քաղաքներում առողջապահության հանրային քաղաքականության համատեքստում։

Դանիելյանը կոչ արեց աշխարհի բոլոր քաղաքներին հանրային նշանակության տարածքներ տրամադրել առողջության պահպանմանը նպաստող միջոցառումների անցկացման համար։ Դրանք կարող են լինել քաղաքային զբոսայգում կազմակերպվող միջոցառումներ, հանդիպումներ քաղաքապետարանում, քաղաքի մաքրությանը նվիրված ակցիաներ, ինչպես նաև ճանապարհային երթևեկության դադարեցումը փողոցների առանձին հատվածներում ընթացիկ տարվա ապրիլի 7-ից 11-ը։

Հարցեր, պատասխաններ, մեկնաբանություններ