Ինչպես տոնական օրերին խուսափել աղեստամոքսային համակարգի խանգարումներից. «Արմենիա» ՀԲԿ աղեստամոքսային բաժանմունքի ղեկավար Գայանե Մանուշակյան. armeniamedicalcenter.am

Վերջին տարիներին տոնական օրերին սննդային թունավորում ախտորոշմամբ դիմողների թիվը ինչ-որ չափով նվազել է: Մեզ հետ զրույցում ասաց «Արմենիա» ՀԲԿ աղեստամոքսային և պարբերական հիվանդությունների. բաժանմունքի ղեկավար Գայանե Մանուշակյանը:

«Գուցե բնակչության գրագիտության մակարդակն է բարձրացել, և մարդիկ սկսել են հետևել բժիշկների խորհուրդներին»:

Ըստ Գ. Մանուշակյանի՝ տոնական օրերին աղեստամոքսային համակարգի խանգարումներից խուսափելու համար անհրաժեշտ են հետևյալ  կանխարգելիչ միջոցները.

Խուսափել շատակերությունից, որի համար խորհուրդ է տրվում հնարավորինս չխախտել ամենօրյա սննդակարգը, հատկապես դա վերաբերվում է դեկտեմբերի 31-ին, երբ մարդկանց մոտ սովորություն կա ամբողջ օրը սպասել և կեսգիշերին ուտել, ինչը սխալ է. օրվա նախաճաշը, ճաշը, ընթրիքը պետք է կազմակերպել սովորականի պես, կարելի է նաև խմել 2 բաժակ ոչ սառը ջուր. ջրով լցված ստամոքսը կկանխի շատակերությունը: Եթե որոշել եք Ամանորը դիմավորել ոչ սեփական հարկի տակ, ապա փորձեք տանից դուրս գալուց առաջ ինչ-որ հագեցնող բան ուտել. օրինակ՝ 2-3 գդալ վարսակաշիլա (геркулес), ինչը որոշ չափով կփակի ախորժակը:

• Ուտեստների բազմազանության պայմաններում աշխատեք չխախտել հերթականությունը՝ աղցան, տաք ուտեստ, աղանդեր:
• Խորհուրդ է տրվում ուտել նախատեսված չափաբաժնի կեսը՝ առանց շտապելու, դանդաղ ծամելով:
• Ստամոքսը չծանրաբեռնելու համար հարկ է երկար չնստել, հարկավոր է շարժվել, պարել:

Ճաշատեսակները գերադասելի է պատրաստել առանց ընդունված խյուսերի. մայոնեզի փոխարեն օգտագործեք կիտրոնի հյութ և մի քանի կաթիլ բուսայուղ (արևածաղկի կամ ձիթապտղի): Մայրաքաղաքային աղցանի փոխարեն պատրաստեք թարմ բանջարեղենով աղցաններ:

Անդառնալով մսամթերքից պատրաստած ճաշատեսակներին՝ Գ. Մանուշակյանն ասաց, որ խրախուսելի չէ ավանդական խոզի բուդը: Ըստ նրա՝ բարձր կալորիականություն ունեցող խոզի և ոչխարի մսի փոխարեն կարելի է օգտագործել թռչնամիս, ճագարի, հորթի միս և ծովամթերք:

Բժշկուհին խոսեց նաև աղանդերի մասին. «Անշուշտ, առանց աղանդերի հնարավոր չէ պատկերացնել տոնական սեղանը: Եթե լիովին անհնար է հրաժարվել աղանդերից, ապա նախընտրելի է մրգային մաս պարունակող տարբերակը»:

Տոնական սննդից բացի, բժշկուհին խորհուրդ տվեց հետևողական լինել նաև ըմպելիքների նկատմամբ: «Նախընտրելի են միայն չոր և քիչ ալկոհոլ պարունակող ըմպելիքները. քիչ հավանական է, որ դրանք ընդունելուց հետո արագ կվերածվեն ճարպի: Նախընտրելի է կարմիր չոր գինին՝ 1-2 գավաթ կամ, ընդունված կարգի համաձայն, շամպայն: Չեն խրախուսվում նաև գազավորված ըմպելիքները:

Տնտեսուհիներին խորհուրդ է տրվում չպատրաստել մեծ քանակով ուտեստ, հատկապես աղցաններ, որոնք ավելի արագ են ենթարկվում քայքայման և կարող են դառնալ աղեստամոքսային համակարգի սուր խանգարումների պատճառ:

Նշված խանգարումների նախանշաններն են սրտխառնոցը, փսխումը, լուծը, որովայնում ցավը:

Տան պայմաններում, սովորաբար, ընդունված է կատարել հոգնա, ստամոքսի լվացում` սովորական ջրով կամ նատրիումի հիդրոկարբոնատի լուծույթով (կերակրի սոդա): Սակայն պետք է հիշել, որ վերոնշյալ նախանշանները կարող են լինել ավելի վտանգավոր, հղի բարդություններով՝ այլ հիվանդությունների դեպքում, ուստի անդառնալի հետևանքներից խուսափելու համար ժամանակին կանխեք խնդիրը՝ դիմելով մասնագետի օգնությանը »,- հորդորում է բժշկուհին:

«Հարկ է նշել, որ տոնական օրերին մեր բաժանմունքում կգործի շուրջօրյա հերթապահություն` բուժօգնության կարիք ունեցող պացիենտներին պատշաճ մասնագիտական օգնություն ցուցաբերելու համար»,- զրույցի վերջում ասաց Գ. Մանուշակյանը:

Հարցեր, պատասխաններ, մեկնաբանություններ