Ձմերուկը կարող է օգնել էրեկտիլ դիսֆունկցիայի դեմ պայքարում. news.am

Ձմերուկը կարող է օգնել էրեկտիլ դիսֆունկցիայի դեմ պայքարում, պնդում է սննդի մասնագետ Լիլի Սաուտերը:  Նրա խոսքով, ձմերուկն առողջության համար արդյունավետ է մի շարք դեպքերում. լայնացնում է նեղացած արյունատար անոթները (ինչը հաճախ է պատահում դիաբետով հիվանդների մոտ), օգնում է նվազեցնել զարկերակային ճնշումը եւ արյան մեջ խոլեսթերինի մակարդակը: Այդ ամենը բարենպաստ ազդեցություն է ունենում տղամարդկանց էրեկտիլ գործառույթների վրա:

Էրեկտիլ դիսֆունկցիան, որը ժողովրդի մեջ անկարողություն են կոչում, տղամարդկանց շրջանում բավականին տարածված խնդիր է: Առավել հաճախ այն բուժում են այնպիսի դեղերի օգնությամբ, ինչպիսին, օրինակ`  վիագրան է, որոնք ուժեղացնում են արյան հոսքը դեպի սեռական օրգաններ:  Ձմերուկը, մասնագետի խոսքով, մոտավորապես նման ազդեցություն է ունենում, սակայն չունի այդ դեղերի երկրորդական հետեւանքները: 

Սաուտերի խոսքով, ձմերուկը պարունակում է ցիտրուլին անունով ամինաթթու, որն օգնում է թուլացնել արյունատար անոթների լարվածությունը: Երբ մենք ձմերուկ ենք ուտում, ցիտրուլինը փոխակերպվում է արգինին ամինաթթվի, որն ուժեղացնում է ազոտի  օքսիդի պարունակությունը, ինչը պատասխանատու է արյունատար անոթների լարվածության թուլացման եւ լայնացման համար:

Դեռեւս 2011թ. անցկացված հետազոտությունը ցույց է տվել, որ ցիտրուլինի օգտագործումն էական դրական ազդեցություն է գործում չափավոր անկարողությամբ տառապող տղամարդկանց վրա: Հետազոտության մասնակիցները, ովքեր էրեկցիայի խնդիրներ են ունեցել, կամ ցիտրուլին են ստացել, կամ` պլացեբո, ընդ որում, դեղերի փոփոխությունը կատարվել է ամեն ամիս: Կամավորներն օրագրեր են պահել, որոնցում նշել են էրեկցիայի հետ կապված խնդիրները: 

Արդյունքները ցույց են տվել, որ ցիտրուլինը` պլացեբոյի համեմատ, վառ արտահայտված ազդեցություն ունի անկարողության բուժման գործում: Ընդ որում, ցիտրուլինով հավելումներն անհամեմատ ավելի անվնաս եւ լավ տանելի են եղել, քան վիագրայի ազդեցությունն ունեցող դեղերը, որոնք կարող են դեմքի կարմրություն, գլխացավ, սրտխառնոց, փորլուծություն, երբեմն նաեւ լսողության կորուստ ու գլխապտույտ առաջացնել: Ձմերուկն, իհարկե, նման կողմնակի ազդեցություն չունի:

Հարցեր, պատասխաններ, մեկնաբանություններ