Երիտասարդացնող ըմպելիք, որն ունի բազմաթիվ օգտակար հատկություններ

Դդումն ունի միզամուղ, երիկամները մաքրող, հակաբորբոքային ազդեցություն, օգտակար է լյարդի, երիկամների հիվանդությունների դեպքում, կարոտինային նյութերի եւ A վիտամինի մատակարար է, պարունակում է հակաուռուցքային ֆլավոն լյութեոլին:

Մաղադանոսն ունի լեղամուղ, հակակարկամային հատկություն, նպաստում է աղիների, միզապարկի, արգանդի մկանների ամրացմանը, պարունակում է հակաքաղցկեղային ֆլավոն ապիգենին: Վերջերս հրապարկվել է տեղեկություն այն մասին, որ մաղադանոսից ստացված պատրաստուկները տրոհում են թոքերի քաղցկեղի բջիջները: Իսկ բուլղարացի բժիշկները տարածել են հաղորդագրություն, որ մաղադանոսն առաջացնում է նաեւ կրծքագեղձի ու ձվարանի քաղցկեղի բջիջների ապոպտոզ, սակայն չի ազդում առողջ բջիջների վրա:

Սոճու կամ եղեւնու մատղաշ ասեղիկները պարունակում են զգալի քանակությամբ C վիտամին ու ֆլավոնոլ կվերցետին:
Առաջարկվող թուրմը բարձրացնում է օրգանիզմի դիմադրողականությունը, հզոր հակաօքսիդանտ է, նպաստում է աղեստամոքսային ու սրտանոթային համակարգերի, շնչուղիների բնականոն աշխատանքին, ունի լեղապարկն ու երիկամները մաքրող ազդեցություն, օգտակար է թե՛ կանանց, թե՛ տղամարդկանց: Թուրմը պարունակում է նաեւ բազմաթիվ այլ օգտակար նյութեր:

Կտրատեք դդումի 500գ պտղամիս, լցրեք 3լ եռջրի մեջ, ավելացրեք 50գ թարմ մաղադանոս (30գ չոր), 10 րոպե եփեք, 1 ժամ թրմեք, քամեք: Սոճու կամ եղեւնու 100գ մատղաշ ասեղիկները մանրացրեք, խառնեք շաքարավազին (1:1) կամ մեղրին: Խառնուրդը լցրեք եփուկի մեջ, 3 օր թրմեք տաք տեղում, քամեք: Պահեք սառնարանում: Խմեք 200-ական մլ, օրը 3 անգամ, ուտելուց առաջ, գոլ վիճակում: Կարելի է ավելացնել 2-ական գրամ քրքումի փոշի:

Զգուշացում: Եփուկի պահպանման առավելագույն ժամկետը 7 օր է: Անհրաժեշտության դեպքում պատրաստեք նորը:

Կարեւոր է իմանալ: Փշատերեւ ծառատեսակների ճյուղերում եւ ասեղիկներում C վիտամինի ու կվերցետին ֆլավոնոլի պարունակությունը ձմռան շրջանում հասնում է առավելագույնի: Հումքը ցանկալի է պահել 0-10OC ջերմաստիճանի պայմաններում:

Հարցեր, պատասխաններ, մեկնաբանություններ