Սերկեւիլ

Դեռ հնում` 4000 տարի առաջ, սերկեւիլի համեղ ու բուրավետ պտուղներն անվանում էին «ոսկե խնձորներ»: Դեռ այն ժամանակ այդ պտուղները համարվում էին սիրո, գեղեցկության, պտղաբերության ու ընտանեկան ջերմության խորհրդանիշ: Նույնիսկ Հին Հունաստանում, հարսանիքի օրը նորապսակները պետք է անպայման սերկեւիլ ուտեին, որպեսզի նրանց ողջ կյանքն անցներ համերաշխ ու բարի մթնոլորտում:

Սերկեւիլը շատ ջերմասեր բույս է, սակայն կարող է նաեւ դիմանալ 30-40 աստիճան սառնամանիքին: Այս համեղ ու բուրավետ պտուղներից պատրաստում են հյութեր, կոմպոտներ, մուրաբա եւ այլ պահածոներ: Օգտագործվում է նաեւ գինեգործության ու հրուշակեղենի արտադրության մեջ:

Բուժական նպատակով օգտագործվում են սերկեւիլի պտուղները: Դրանք պարունակում են մինչեւ 12 տոկոս ֆրուկտոզա, գլյուկոզա, սախարոզա, օրգանական թթուներ` խնձորաթթու, գինեթթու, կիտրոնաթթու, պեկտինային ու դաբաղային նյութեր, ասկորբինաթթու եւ շատ միկրոտարրեր: Սերմերը պարունակում են մոտ 20 տոկոս լորձ. օսլա, ճարպայուղեր եւ այլ օգտակար նյութեր:

Սերկեւիլի սերմերն ու պտուղները օգտագործվում են որպես կապակցող դեղամիջոց աղեստամոքսային տրակտի հիվանդությունների` լուծի, արյունահոսությունների ժամանակ: Որպես միզամուղ միջոց` այն լայնորեն կիրառվում է սրտանոթային հիվանդությունների վիճակը թեթեւացնելու համար, իսկ սերմերից պատրաստած թեյը` մրսածության, հազի, բրոնխիտի, ինչպես նաեւ՝ սպաստիկ կոլիտի բուժման համար:

Սերկեւիլը նաեւ հանդիսանում է սրտխառնոցը հանգստացնող միջոց, իսկ թարմ պտուղները երկաթի բարձր պարունակության շնորհիվ կիրառվում են սակավարյունության դեպքում: Պտուղներն օժտված են նաեւ հականեխիչ հատկությամբ: Նույնիսկ փաստեր կան, որ միջնադարի հայկական իրականության մեջ սերկեւիլից պատրաստված եփուկներով բուժում էին հազը, թոքախտն ու այլ դժվար բուժվող հիվանդություններ: Իսկ ահա մեզ ուղարկված նամակներից մեկում նույնիսկ նշվում է, որ լնդերի արյունահոսության համար շատ լավ միջոց է սերկեւիլի ցողունների կեղեւներից պատրաստված եփուկով ողողումը: Դրա համար անհրաժեշտ է 1 թեյի գդալ ծառի ցողունների կեղեւը լցնել 300 մլ ջրի մեջ ու մարմանդ կրակի վրա եփել:

Սերկեւիլի թարմ պտուղներից պատրաստված օշարակն անեմիայի ժամանակ շատ օգտակար է, իսկ դրանք խորոված կամ եփած վիճակում օրը 100-ական գրամ կարելի է ուտել բրոնխիտի դեպքում, ինչպես նաեւ լավ լեղամուղ միջոց է: Սերկեւիլի լորձաթուրմը (որի պատրաստման համար անհրաժեշտ է 5:100 հարաբերությամբ ամբողջական սերմերի վրա ջուր լցնել ու մի քիչ թողնել), շատ լավ է աչքերի լվացման համար, բրոնխիտի, շնչուղիների շատ հիվանդությունների, սպաստիկ կոլիտի եւ նմանատիպ այլ հիվանդությունների բուժման համար: Այն նաեւ շատ լավ սնուցող դիմակ կարող է հանդիսանալ դեմքի մաշկի համար:

Պետք է ասել, որ, իհարկե, սերկեւիլ խորհուրդ չի տրվում օգտագործել կերակրող մայրերին, քանի որ այն կարող է փորկապության պատճառ դառնալ:

Հարցեր, պատասխաններ, մեկնաբանություններ