Ուղեղային իմպլանտի արդյունքում կաթվածահար տղամարդը նորից զգում է հպումները. news.am

30-ամյա Նաթան Քոուփլենդը, ով արդեն 10 տարի կաթվածահար է, կարողացել է հպումները զգալ ռոբոտ ձեռքի եւ գլխուղեղի կեղեւի տակ տեղադրված էլեկտրոդների շնորհիվ: Այս մասին հայտնել են University of Pittsburgh Medical Center-ի մասնագետները:

Ավելի քան 10 տարի առաջ Նաթանը վթարի է ենթարկվել եւ գործնականում անշարժունակ դարձել. նա միայն կարողացել է թեթեւակի ուսերը շարժել: Հինգ տարի առաջ նա համաձայնել է կամավոր մասնակցել Փիթսբուրգի համալսարանի գիտնականների իրականացրած հետազոտություններին: Գիտնականները ցանկանում էին նոր մեթոդ փորձարկել, որը, նրանց կարծիքով, կաթվածահար մարդկանց կկարողանար վերադարձնել հպումը զգալու ունակությունը:

Անցյալ տարի հետազոտողները Նաթանի ուղեղի աջ կիսագնդի մեջ իմպլանտ են տեղադրել՝  4 էլեկտրոդներ. կեղեւի այն շրջանում, որը պատասխանատու է աջ ձեռքին եւ մատներին հպումներն զգալու համար: Այդ էլեկտրոդներն ազդանշան էին ստանում ռոբոտ ձեռքից. պրոթեզի մատները սեղմելիս տղամարդը սեղմում էր զգում իր կաթվածահարված աջ ձեռքի մատներին: Փորձի ընթացքում Նաթանի աչքերը կապել են, եւ նա չէր տեսնում, թե գիտնականները երբ են սեղմում պրոթեզը. հիվանդը կարողացել է ճշգրիտ որոշել, թե որ մատն է սեղմել հետազոտողը:

Թե՛ հիվանդը, թե՛ գիտնականներն անչափ տպավորված են ստացած արդյունքից: Նախկինում ոչ մեկին չի հաջողվել համանման արդյունքի հասնել. վերջույթներից զրկված մարդիկ արհեստական ձեռքի միջոցով գործողություններ կատարելու հնարավորություն ունեցել են, սակայն այդ պրոթեզներով զգալ չեն կարողացել: Ներկայում ամեն ինչ կարող է փոխվել, եւ նոր պրոթեզներ կհայտնվեն, որոնք հիմնական ֆունկցիայից բացի իրենց տերերին կօգնեն զգալ հպումը:

Փորձը հնարավոր է դարձել միկրոէլեկտրոդները ստեղծած Blackrock Microsystems-ի ինժեներների եւ Johns Hopkins University-ի Applied Physics Lab լաբորատորիայի գիտնականների հետ համագործակցության շնորհիվ:

Հարցեր, պատասխաններ, մեկնաբանություններ