Հետծննդյան արյունահոսության դեմ պայքարի սարք է մշակվում. news.am

Institute of Translational medicine-ի գիտնականները` Էնդրյու Ուիքսի գլխավորությամբ, ինչպես նաեւ այլ հետազոտական կազմակերպությունների մասնագետներ 850 000 ֆունտ սթեռլինգի չափով դրամաշնորհ են ստացել հետծննդյան արյունահոսության դեմ պայքարի սարք մշակելու համար:

Հետծննդյան արյունահոսությունը ծննդաբերությունից հետո առաջին 24 ժամվա ընթացքում ի հայտ եկող բարդություններից է, որի հետեւանքով կինը կարող է ավելի քան 500-1000 մլ արյուն կորցնել: Այդ բարդությունն աշխարհում մայրական մահացության ամենատարածված պատճառներից է. աշխարհում ծննդկանների մոտավորապես 25 տոկոսը մահանում է հետծննդյան արյունահոսության հետեւանքով:

Պրոֆեսոր Էնդրյու Ուիքսն ու իր գործընկերները հատուկ սարք են մշակել, որը PPH Butterfly անվանումն է ստացել: Այն ո՛չ միայն ի վիճակի է կանգնեցնել հետծննդյան արյունահոսությունը, այլեւ պարզել դրա ի հայտ գալու պատճառը:

Սարքի նախատիպն արդեն ստեղծվել է եւ մոտ ժամանակներս հետազոտողները նախատեսում են շարունակել հետազոտությունները, ինչպես նաեւ հիվանդների վրա փորձարկել սարքի անվտանգությունը: Հենց այդ փորձարկումների իրականացման համար է տրվել դրամաշնորհը:

Վերջերս սարքի մշակման համար Ուիքսն ու իր գործընկերները Հյուսիս-արեւմտյան ափի Առողջապահական գիտական ցանցի Նորարարության մրցանակին են արժանացել:

Հարցեր, պատասխաններ, մեկնաբանություններ