Հաջողությամբ են ավարտվել զարկերակի լուծվող ստենտի առաջին փորձարկումները. news.am

Abbott Vascular  ընկերության ստենտը, որը լուծվում եւ անհետանում է տեղադրումից մի որոշ ժամանակ անց, մեկ տարի տեւած հետազոտության ընթացքում ցույց է տվել, որ նույնքան արդյունավետ է, որքան սովորական ստենտը։

Ստենտները փոքրիկ ցանցեր են, որոնք զարկերակներին թույլ չեն տալիս նորից խցանվել անգիոպլաստիկայի միջամտությունից հետո։ Սովորաբար այդ ստենտները պատրաստվում են մետաղից եւ հաճախ ծածկված են լինում հատուկ դեղով ։ Երբեմն տեղադրումից որոշ ժամանակ անց մետաղական ստենտները սկսում են բորբոքվել  եւ այլ խնդիրներ առաջացնել։ Իսկ Absorb  անունով լուծվող ստենտը ստեղծված է հատուկ նյութից, որը մեկ տարի շարունակ տեղում է մնում, հետո 2 տարվա ընթացքում տարալուծվում է։ Christ Heart and Vascular Center-ի բժիշկ Դինա Կարեյակեսի կարծիքով այդքան ժամանակը հերիք է , որպեսզի զարկերակը վերականգնվի։ Իսկ ստենտի տարալուծումից հետո զարկերակը վերադառնում է իր բնական վիճակին։

Լուծվող ստենտի փորձարկումներին մասնակցել է 1 կամ 2 խցանված զարկերակի պատճառով կրծքի ցավեր ունեցող 2000 հիվանդ։

Փորձարկման նպատակն է եղել ամերիկյան Food and Drug Administration-ի հավանությանն արժանանալը, որպեսզի հնարավորություն ունենան ԱՄՆ-ի տարածքում օգտագործել եւ վաճառել այդ ստենտները։ Փորձարկումները ցույց են տվել, որ հիվանդները, որոնց զարկերակներում նման ստենտներ են տեղադրել, իրենց ճիշտ այնպես են զգացել, ինչպես այն մարդիկ, ում զարկերակում մետաղական ստենտներ էին տեղադրել։ Մեկ տարվա ընթացքում երկու խմբի հիվանդների 6-7 տոկոսը  կամ մահացել է սրտի կամ վիրահատված զարկերակի հետ կապված խնդիրներից կամ կրկնակի վիրահատության կարիք է ունեցել։ Մասնագետներն ակնկալում էին, որ լուծվող ստենտի տեղադրումից հետո արդյունքներն ավելի լավը կլինեին, բայց պարզվել է, որ այդպես չէ․ արդյունքները մոտավորապես նույնն են։

Այժմ մասնագետները նախատեսում են ավելի լայնածավալ հետազոտություն անցկացնել՝ 5000 հիվանդի մասնակցությամբ։

Հարցեր, պատասխաններ, մեկնաբանություններ