Գիտնականները իդեալական միջոց են մշակել ծովային հիվանդության դեմ. news.am

Ծովային հիվանդության ախտանիշների թեթեւացման նպատակով բրիտանացի գիտնականներն առաջարկում են օգտագործել էլեկտրական հոսանքի լիցքեր: Ծովային հիվանդությունն առաջանում է, երբ ուղեղը սկսում է շարժման մասին հակասական ազդակներ ստանալ տեսողական ու հենաշարժային համակարգերից: Ավտոմեքենայով ճամփորդելիս, ատրակցիոններում կամ ծովային շրջագայության ժամանակ առաջացող այս անհարմարության զգացումը վերացնելու համար առաջարկում են էլեկտրական հոսանքի լիցքով ազդել ուղեղի այն մասի մաշկի վրա, որը պատասխանատու է շարժման իմպուլսները մշակելու համար:

Փորձի ընթացքում 20 կամավորներ նստել են հատուկ աթոռին, որը նմանակում է ճոճվելու շարժումը: Այդ մարդկանցից տասին հոսանքի աննկատ լիցքեր են հաղորդել, իսկ փորձի մյուս մասնակիցներին կեղծ բուժում են իրականացրել:

Ի վերջո, նրանք, ում վրա փորձարկում էին լիցքերը, տիեզերագնացի աթոռում կարողացել են 207 վայրկյան ավելի երկար մնալ ու ավելի արագ վերականգնվել: Բացի դրանից, գիտնականները չեն նկատել նաեւ հոսանքաբուժության որեւէ կողմնակի ազդեցություն: Այս թեմայով հոդվածը հրապարակվել է Neurology բժշկական ամսագրում:

Հետազոտողները մտադիր են 5-10 տարի հետո ստեղծել ու վաճառքի դնել մի սարք, որն էլեկտրական հոսանքը կհասցնի ուղեղին ՝ սովորական ականջակալների միջոցով: Գիտնականներն ասում են, որ այս գաղափարով արդեն հետաքրքրվել են զինվորականները, ովքեր հաճախ են բախվում ծովային հիվանդությանը՝ նավերի վրա ծառայություն անցնելու կամ օդանավ վարելու ընթացքում:

Հարցեր, պատասխաններ, մեկնաբանություններ