Արյան հիվանդությունների բուժման նոր մեթոդները երկարացնում են հիվանդությամբ տառապող մարդկանց կյանքը

Արյան հիվանդությունները չնայած շատ տարածված չեն, սակայն շատ ծանր են, երկարատև բուժում են պահանջում, ինչը շատ թանկ արժե: Այս մասին այսօր լրագրողների հետ զրույցում ասաց «Ոսկրածուծի դոնորների հայկական ռեեստր» (ՈԴՀՌ) բարեգործական հինադրամի բժշկական տնօրեն Միհրան Նազարեթյանը` խոսելով արյան հիվանդությունների բուժման ժամանակակից հնարավորությունների մասին:

Ըստ նրա` այս հիվանդությունները բժշկության մեջ մեծ տեղ չեն գրավում, սակայն մեծամասամբ այդ հիվանդությունները դրամատիկ են ընթանում: Նշվեց նաև, որ արյան հիվանդություններն ի հայտ են գալիս մանկական հասակում, երիտասարդության շրջանում, հանդիպում է նաև ավելի մեծ տարիքում:

Մ.Նազարեթյանի խոսքերով` արյան հիվանդությունները բաժանվում են երկու խմբի` չարորակ արյան հիվանդություններ, սպիտակարյունություն և ձեռքբերովի արյան հիվանդություն, որն ավելի մեղմ է ընթանում: Ըստ նրա` եթե արյան չարորակ հիվանդություններով տառապող երիտասարդ մարդիկ ժամանակին բուժվում են, ապա նրանց 60-70 տոկոսն ապրում են 5 տարուց ավելի: Հնարավոր է, որ երկարատև բուժումից հետո կարող են ընդմիշտ բուժվել, կամ ապրել 15 տարի:

«Այսօր բուժման մեջ նոր մեթոդներ են ի հայտ եկել` քիմիոթերապիային գումարվել է ցողունային բջիջների, ոսկրածուծի բջիջների փոխպատվաստումը և նիշային դեղամիջոցները, որոնց օգտագործումը կանգնեցնում է ուռուցքի սնուցումը»,- նշեց Մ.Նազարեթյանը:

Ինչպես եվրոպական երկրներում, այնպես էլ Հայաստանում վիճակագրությունը գրեթե միշտ նույնն է եղել. 100 հազար բնակչից 12-14-ը տառապում է այդ հիվանդությամբ: Նա հայտնեց, որ այս թվի մեջ մեծ աճ չկա, պարզապես ախտորոշումն է զարգացել: Նշվեց նաև, որ այդ հիվանդություններն ունեն գենետիկական բնույթ:

Հարցեր, պատասխաններ, մեկնաբանություններ