Նոր թեստն 90 տոկոս ճշգրտությամբ ախտորոշում է ուղեղի ցնցումը. news.am

Northwestern University-ի հետազոտողները նոր թեստ են մշակել, որը կարող է 90% ճշգրտությամբ որոշել. արդյո՞ք մարդն ուղեղի ցնցում է տարել: Թեստը հիմնված է ձայնային ալիքներին ուղեղի արձագանքման վրա:

40 երեխաների մասնակցությամբ հետազոտության ընթացքում գիտնականները նրանց գլխին էլեկտրական հաղորդիչներ են տեղադրել եւ հետեւել ձայնային ազդանշաններին ուղեղի արձագանքմանը: Պարզվել է, որ ցնցում տարած եւ չտարած երեխաների ուղեղի արձագանքն, իսկապես, տարբերվել է. ցնցումով երեխաների մոտ այն 35%-ով ավելի պակաս էր արտահայտված, քան ցնցում չտարածների: Ցնցումից հետո վերականգնվելով՝ նրանց արձագանքումը, սակայն, կարգավորվել է:

Այս թեստի միջոցով գիտնականները ցնցման առկայությունը ճշգրիտ որոշել են 90% դեպքերում, իսկ բացակայությունը` 95% դեպքերում: Գիտնականները հետագայում հույս ունեն ցնցման ախտորոշման համար շարժական սարք ստեղծել:

Նշենք, որ նախկինում իրականացված հետազոտության տվյալների համաձայն՝ գանգ-ուղեղային վնասվածքները փչացնում են երեխայի եւ ծնողների հարաբերությունները: Այս հարաբերությունների որակը ցնցում տարած երեխաների խմբում զգալիորեն ցածր էր, քան ստուգիչ խմբում: Մասնագետները ծնողներին խորհուրդ են տալիս վնասվածքից հետո մի քանի շաբաթ հետեւել երեխայի վարքագծին եւ, անհրաժեշտության դեպքում, միջոցներ ձեռնարկել:

Հարցեր, պատասխաններ, մեկնաբանություններ