Նոր USB սարքը րոպեների ընթացքում ՄԻԱՎ-ի առկայությունը ստուգող արյան հետազոտություն կիրականացնի. news.am

Լոնդոնի Կայսերական քոլեջի (Imperial College London) ու ամերիկյան DNA Electronics ֆիրմայի գիտնականները USB կուտակիչով սարք են ստեղծել, որը կկարողանա արագ ու հստակ որոշել մարդու արյան մեջ իմունային անբավարարության վիրուսի առկայությունը։ Սարքը որոշում է վիրուսի խտությունն արյան կաթիլի մեջ, իսկ հետո էլեկտրական ազդանշան գեներացնում, որը կարելի է հաշվել որեւէ շարժական սարքի USB-պորտով։ Թեստի ճշգրտությունը հասնում է 95 տոկոսի։

Մշակողները հայտնում են, որ շուտով այս տեխնոլոգիան ՄԻԱՎ-դրականով մարդկանց հնարավորություն կտա հետեւել իրենց արյան մեջ վիրուսի մակարդակին, ինչպես շաքարախտով հիվանդներն են հսկում իրենց արյան մեջ շաքարի մակարդակը։ Նոր թեստի օգուտը կասկածից վեր է. հիմա սովորական թեստերը կարող են միայն ստուգել մարդու արյան մեջ ՄԻԱՎ վիրուսի առկայությունը կամ բացակայությունը, իսկ վիրուսի խտությունը ստուգելու համար պետք է հատուկ անալիզներ հանձնել ու 3 օր սպասել։ USB սարքով թեստը զգալիորեն արագացնում է այդ տեղեկությունը ստանալը։

Թեստն անցնելու համար պետք է USB-կուտակիչի վրա որոշակի վայրում դնել արյան մեկ կաթիլ ու եթե դրա մեջ հայտնաբերվում է վիրուսը, ապա չիպում թթվայնությունը փոխվում է, ու ըստ դրա փոփոխության՝ չիպը էլեկտրական ազդանշան է ուղարկում կուտակիչին։ Համակարգչի միջոցով հետո կարելի է իմանալ՝ արյան մեջ վիրուսի քանակն ավելացել է, թե նվազել։ Նոր թեստը օգտագործել են արյան 991 նմուշի անալիզի համար ու այն 95 տոկոսանոց ճշգրտություն է ցույց տվել։ Թեստն անցնելու միջին ժամանակը կազմում էր 20.8 րոպե։

Հարցեր, պատասխաններ, մեկնաբանություններ