Գերմանացի գիտնականներն առաջին անգամ են սրտի ՄՌՏ իրականացրելլ 7Տ տոմոգրաֆի օգնությամբ. news.am

Charité-Universitätsmedizin Berlin համալսարանի եւ Max Delbrück Center կենտրոնի գերմանացի գիտնականներն առաջին անգամ սրտաբանական հետազոտությունների համար 7Տ-ՄՌՏ են օգտագործել: Կարդիովասկուլյար մագնիսառեզոնանսային տոմոգրաֆիան արդեն դառնում է հիմնական մեթոդներից մեկը, որը կիրառվում է սրտաբանության մեջ՝ ինֆարկտների ախտորոշման համար: Այս պահին սրտաբաններն օգտագործում են 1.5 ու 3 Տեսլա հզորության տոմոգրաֆներ: 7Տ տոմոգրաֆը թույլ է տալիս ախտորոշիչ բարձր ճշգրտություն ապահովել ու հյուսվածքները դիտել լավ թողունակությամբ: Ամբողջ աշխարհում միայն հինգ բժշկական կենտրոններում է այսօր կատարվում սրտի 7Տ ՄՌՏ:

Ջանեթ Շուլց Մենգերը ու նրա գործընկերները հետազոտություն են արել, որին մասնակցել են հիպերտրոֆիկ կարդիոմիոապաթիայով 13 հիվանդներ: Նրանք բոլորն անցել են տարբեր հետազոտություններ: Որպես հսկիչ խումբ փորձին մասնակցել են նաեւ առողջ մարդիկ:

Հետազոտությունը ցույց է տվել, որ 7Տ ՄՌՏ-ն, իրոք, թույլ է տալիս հետազոտությունն իրականացնել բարձր ճշգրտությամբ ու կառուցվածքային փոփոխություններ հայտնաբերել նույնիսկ փորոքի պատերի հաստացած մասերում: Ավելին, նրանց հաջողվել է տեսնել այնպիսի շեղումներ, որոնք նախկինում կլինիկական պրակտիկայում հնարավոր չէր վիզուալիզացնել:

Գիտնականները վստահ են, որ 7Տ ՄՌՏ զարգացումը շատ բան կտա սրտաբաններին ու կօգնի արդյունավետորեն ախտորոշել հիվանդություններն ու վիզուալիզացնել սրտի աշխատանքի ու կառուցվածքի այնպիսի շեղումներ, որոնք նախկինում հնարավոր չէր:

Հարցեր, պատասխաններ, մեկնաբանություններ