Արյան հետազոտությունը կօգնի ժամանակին հայտնաբերել կրծքի քաղցկեղի կրկնության վտանգը. med.news.am

Արյան պարզագույն հետազոտությունը կօգնի ախտորոշել կրծքի քաղցկեղի կրկնությունը 7 ամիս ավելի շուտ, քան դա թույլ են տալիս առկա մեթոդները: Այդ մասին պատմել են Լոնդոնի Ուռուցքաբանական հետազոտությունների ինստիտուտի գիտնականները, ովքեր մշակել են այդ մեթոդը:

Այդ նոր հետազոտությունը, որի հիմքում ուռուցքների ԴՆԹ-ի հետազոտությունն է, արդեն փորձարկում է անցնում մի շարք բրիտանական կլինիկաներում: Նրա օգնությամբ հնարավոր է ախտորոշել քաղցկեղային մնացորդային բջիջների նույնիսկ փոքր քանակությունը, ինչը նշանակում է, որ կրծքի քաղցկեղի կրկնության վտանգը հայտնաբերվում է ավելի շուտ, քան այլ մեթոդների կիրառությամբ:

Թեստը ո՛չ միայն վերացնում է ինվազիվ բիոփսիաների անհրաժեշտությունը, այլեւ թույլ է տալիս փոփոխել բուժումը, որովհետեւ որսում է ուռուցքների պարունակության մեջ գեների առանցքային մուտացիաները: Հետազոտողները հավաստիացնում են, որ արյան այդ հետազոտության մշակումը կարեւոր քայլ է դեպի, այսպես կոչված, «հեղուկ բիոփսիայի» օգտագործումը, ինչը կարող է հեղափոխել կրծքի քաղցկեղի կրկնման դեպքերի բուժումը եւ դրա ախտորոշումը` բժիշկներին օգնելով բուժման լավագույն մեթոդներ ընտրել:

«Մենք առաջանում ենք դեպի ուռուցքաբանության հիվանդների համար անհատականացված բժշկության ժամանակաշրջան,- ասել է պրոֆեսոր Պոլ Ուորմանը` Ուռուցքաբանական հետազոտությունների ինստիտուտի ղեկավարը: Թեստը մեզ կօգնի եւս մի քայլ անել այդ ուղղությամբ, որովհետեւ այն որսում է կոնկրետ ուռուցքի բոլոր թույլ օղակները: Նմանատիպ հետազոտությունները մեզ օգնում են ավելի լավ հասկանալ քաղցկեղային ուռուցքների փոփոխությունների առանձնահատկությունները, երբ այդ ուռուցքները պայքարում են այս կամ այն բուժման դեմ: Այդ ընկալումն էլ կօգնի նոր դեղեր ստեղծել»:

Հարցեր, պատասխաններ, մեկնաբանություններ