Սեքսապաթոլոգ. «Ժամանակն է վերախմբագրել «կաղամբի միջից ես դուրս եկել», «արագիլներն են բերել» տարածված միֆերը»

«Որքան էլ սեռական դաստիարակության մասին խոսենք, քննարկումներ կազմակերպենք, այդուհանդերձ շատ հարցեր դեռևս մնում են չքննարկված»: Այս մասին այսօր լրագրողների հետ հանդիպման ժամանակ ասաց ԵՊԲՀ Սեքսապաթոլոգիայի կլինիկայի բժիշկ-սեքսապաթոլոգ, ԵՊԲՀ սեքսոլոգիայի ամբիոնի դասախոս, «Սեքսուալ առողջության պաշտպանություն» հ/կ-ի անդամ Վրեժ Շահրամանյանը:

Նրա խոսքերով՝ սեռակրթությունը մարդու ընդհանուր դաստիարակության անբաժանելի մասն է, հետևաբար, միշտ հարց է ծագում, թե որ տարիքից պետք է զբաղվել երեխաների սեռական դաստիարակությամբ:

Վ. Շահրամանյանը գտնում է, որ սեռական դաստիրակությունը պետք է սկսել վաղ տարիքից: Սեռակրթությունը բաժանվում է մի քանի փուլի և յուրաքանչյուր փուլ պահանջում է յուրահատուկ մոտեցում: Ըստ նրա՝ մանկահասակ երեխաներին միշտ հետաքրքրում է, թե որտեղից են իրենք լույս աշխարհ եկել, և այդ հարցերով հաճախ են դիմում իրենց ծնողներին:
 
«Բայց շատ հազվադեպ է լինում, երբ ծնողը երեխայի տարիքին համապատասխան ճիշտ մեկնաբանություն է տալիս: Հաճախ լինում են բոլորիս հայտնի պատասխանները՝ «կաղամբի միջից ես դուրս եկել», «արգիլներն են բերել» և այլն: Սակայն մենք պետք է հասկանանք, որ վաղուց եկել է ժամանակը, որպեսզի վերախմբագրենք այս մոտեցումները, որոնք հետագայում կարող են մի շարք խնդիրների առաջ կանգնեցնել թե ծնողներին, թե երեխաներին»,- ասաց սեքսապաթոլոգը:

Վ.Շահրամանյանի խոսքերով՝ այսօր բոլորն ուզում են լինել սեռակրթված, բայց, ցավոք սրտի, «չենք գտնում այն բանալիները, որոնցով կարողանան բացել համապատասխան կողպեքները»:

Այդուհանդերձ, բժիշկը նկատեց, որ վերջերս երիտասարդները սկսել են ավելի հաճախ այցելել սեքսապաթոլոգներին: Շնորհիվ զանազան հարցազրույցների, քննարկումների, հրապարակումների` նկատվում է դրական տեղաշարժ, առաջընթաց, մարդիկ հասկանում են սեռակրթության անհրաժեշտությունը: «Կարծես թե սայլը տեղից շարժվում է»,- ասաց նա և ավելացրեց. «Եթե մոտ 5 տարի առաջ կաշկանդվում էին դիմել, հարցեր ուղղել սեքսապոթոլոգին, ապա այսօր քիչ թե շատ առաջընթաց ունենք», -ասաց նա:

Սակայն, նրա խոսքերով, մարզերում խնդիրը մնում է չլուծված, այստեղ անելիքները շատ են, քանի որ գյուղերում ինֆորմացիան ուշ է տեղ հասնում, կամ՝ չի հասնում: Վ.Շահրամանյանը գտնում է, որ պետք է ստեղծել մի համակարգ, որը պարբերաբար կներկայացնի սեռական դաստրիակության համար անհրաժեշտ տեղեկատվություն:

Նա նաև նշեց, որ բուհերում պետք է ներմուծել սեռակրթության նվիրված դասընթացներ, որպեսզի երիտասարդները ձեռք բերեն համապատասխան գիտելիքներ, որպեսզի նրանք խնդիրներ չունենան և հասկանան, որ սեռական առողջությունն ամոթալի չէ:

Հոգեբույժ Արթուր Պողոսյանն էլ նշեց, որ հաճախ կարծիք է հնչում՝ սեռական դաստիարակությունը կբերի սանձարձակության, սակայն, նա հակառակ կարծիքն ունի: «Տեղեկացված, գիտակից մարդը միշտ էլ կարողանում է կառավարել իր սեռական իմպուլսները, պահանջները: Մինչդեռ սեռական կրթություն չստացած և անտեղյակ մարդիկ են ավելի հաճախ բռնաբարության, կոպտության, անհասկանալի սեռական կապերի զոհ դառնում: Կրթված երեխան, կրթված մարդը երբեք սեռական սանձարձակությամբ չի զբաղվի»,- ասաց հոգեբույժը:

Հարցեր, պատասխաններ, մեկնաբանություններ