Դեղագործական հսկաների փորձարկումների հետևանքով մահացել են հազարավոր մարդիկ

Դեղագործական ընկերությունների կողմից նոր դեղամիջոցների կլինիկական փորձարկումների հետևանքով Թուրքիայում մահացել է 893 մարդ։ Այս մասին գրում է բրիտանական The Independent պարբերականը։

Բրիտանական թերթի տեղեկությունների համաձայն՝ ամերիկյան մի շարք դեղագործական ընկերություններ օրենքները շրջանցելու և ավելի քիչ գումար ծախսելու համար իրենց կողմից արտադրվող նոր դեղամիջոցները նախընտրում են փորձարկել աղքատ երկրներում, որոնց շարքում Թուրքիան զբաղեցնում է 6-րդ հորիզոնականը։

«2007–2010թթ. Թուրքիայում իրականացված փորձարկումների հետևանքով մահացել է 893 քաղաքացի։ Մեքսիկայում այդ թիվը հասնում է 1500–ի, իսկ Հնդկաստանում՝ 1700–ի։ Հնդկաստանում միայն 1 տարվա ընթացքում 150 հազար մարդ համապատասխան գումարի դիմաց համաձայնել է մասնակցել դեղագործների փորձարկումներին»,– գրում է The Independent–ը՝ նշելով, որ Հնդկաստանում իրականացվող կլինիկական փորձարկումներին հաճախ մասնակցում են անչափահասներ։

«13–ամյա Սարիտան առանց տեղյակ պահելու իր ծնողներին մասնակցել էր նման փորձարկումներից մեկին։ Ավելի ուշ աղջիկը մահացել է երիկամների հետ ունեցած խնդիրների պատճառով»,– գրում է պարբերականը՝ ավելացնելով. «Կլինիկական փորձարկումներ իրականացնելու տեսանկյունից առաջատար դիրք են զբաղեցնում արևմտյան այնպիսի դեղագործական ընկերություններ, ինչպիսիք են, օրինակ, Pfizer, Bristol Myers, PPD, Squibb, Amgen, Bayer, Eli Lilly, Quintiles, Merck, KGaA, Sanofi-Aventis, Wyeth ընկերությունները։ Իսկ այդ փորձարկումները հիմնականում իրականացվում են Թուրքիայում, Չինաստանում, Մեքսիկայում, Ռումինիայում, Մարոկոյում, Հնդկաստանում»։

Հարցեր, պատասխաններ, մեկնաբանություններ