Լեյկեմիայի բուժման նոր դեղը քիմիաթերապիայից ավելի արդյունավետ է. news.am

Լեյկեմիայի բուժման նոր դեղը կարող է քիմիաթերապիայից ավելի արդյունավետ լինել: Ամեն դեպքում, դա են ցույց տալիս վերջին հետազոտության արդյունքները, որոնք անցկացրել են ամերիկացի գիտնականները:

Գիտնականները Johnson & Johnson եւ AbbVie ընկերությունների մշակած Իմբրուվիկա (Imbruvica) դեղի արդյունավետությունը համեմատել են քիմիաթերապիայի հետ: Հետազոտությանը 65-ն անց, քրոնիկական լեյկեմիայով տառապող 269 հիվանդ է մասնակցել:

Յան Բուրգերն ու իր գործընկերները ցույց են տվել, որ այն մարդկանց մեջ, ովքեր Իմբրուվիկա են ընդունել, լեյկեմիայից մահացությունը  84 տոկոսով պակաս էր այն հիվանդների ցուցանիշների համեմատ, ովքեր քիմիաթերապիայի կուրս են անցել: Դեղի կուրսի ընդունումից մեկ ու կես տարի անց հիվանդների 90 տոկոսի մոտ հիվանդության կրկնության ոչ մի նշան չի հայտնաբերվել:

Իմբրուվիկա ստացած հիվանդների մոտավորապես 86 տոկոսի մոտ ուռուցքի ծավալի առնվազն կրկնակի նվազում է արձանագրվել, իսկ քիմիաթերապիա ստացած հիվանդների` սոսկ 35 տոկոսի մոտ: Նոր դեղը ստացած հիվանդների 4 տոկոսի մոտ է լիակատար առողջացում արձանագրվել, քիմիաթերապիա անցած հիվանդների մոտ այդ ցուցանիշը կազմել է 2 տոկոս:

Ինչպես նշել է բժիշկ Ալեսանդրա Տադեսչին, դեղը նաեւ զգալիորեն բարելավում է ոսկրածուծի աշխատանքը, ինչը հատկապես կարեւոր է տարեց հիվանդների համար, որոնց մահացության պատճառներից մեկը հենց ոսկրածուծի վատ աշխատանքն է:

Այժմ դեղագործական ընկերություններն ուզում են Իմբրուվիկա օգտագործելու հավանություն ստանալ քրոնիկական լեյկեմիայի առաջնային բուժման համար: Առայժմ այն հավանություն է ստացել` օգտագործելու այն հիվանդների բուժման համար, ովքեր թերապիայի գոնե մեկ կուրս արդեն անցել են, սակայն հետազոտությունը ցույց է տվել, որ դեղի օգտագործումն ի սկզբանե արդյունավետ է եղել:

Հարցեր, պատասխաններ, մեկնաբանություններ