ԵՊԲՀ. Երաժշտությունը և առողջությունը. Հարվարդի բժշկական դպրոցի մասնագետների անդրադարձը

Կարո՞ղ է, արդյոք, երաժշտությունը բարելավել մեր առողջությունն ու կյանքի որակը։ Այս հարցին անդրադարձել են Հարվարդի բժշկական դպրոցի մասնագետները։

Նրանց ներկայացրած տեսակետի համաձայն՝ երաժշտությունը բարձրացնում է մեր տրամադրությունն ու բարելավում ինքնազգացողությունը, իսկ երաժշտական թերապիան կարող է օգնել որոշակի առողջական խնդիրների բուժման ժամանակ:

Այսօրվա դժվարին ժամանակներում աշխարհում գերակշռող լարված քաղաքական մթնոլորտը, պատերազմական իրավիճակները, գլոբալ տաքացումը, COVID-ի հետևանքով ֆիզիկական և հոգեկան առողջության շարունակական մարտահրավերներն ազդում են մեր անվտանգության զգացողության և կյանքի որակի վրա:

Ինչպե՞ս կարող է երաժշտությունն ազդել մեր կյանքի որակի վրա:

Հարվարդի բժշկական դպրոցի հետազոտողներն ուսումնասիրել են վերջին շրջանում երաժշտական միջամտության ազդեցությունը կյանքի որակի վրա և փորձել են պատասխանել այն հարցին, թե որն է լավագույն միջոցը, որը նպաստում է լարվածության թուլացմանն ու վերականգնմանը: Վերլուծությունները ցույց են տվել, որ երաժշտական միջամտության օգտագործումը (երաժշտություն լսելը, երգելը և երաժշտական թերապիան) կարող է զգալիորեն բարելավել մարդու հոգեկան և ֆիզիկական առողջությունը:

Թեև հետազոտողները հաստատել են երաժշտության դրական ազդեցությունը կյանքի որակի վրա հոգեբանական առումով, նրանք չեն գտել երաժշտական միջամտության լավագույն չափաբաժինը, որն «աշխատում» է բոլոր մարդկանց դեպքում:

Որպես բարդ արարածներ, որոնք տարբերվում են մշակույթով, կենսափորձով, մտավոր և ֆիզիկական առողջության կարիքներով՝ երաժշտության հետ մարդկանց կապը շատ անհատական է: Երաժշտության հետ մեր հարաբերությունները կարող են լինել շատ գեղեցիկ, խոցելի՝ կախված մեր տրամադրությունից, նախասիրություններից, սոցիալական իրավիճակից և նախկին փորձառություններից:

Կան իրավիճակներ, երբ երաժշտությունը կարող է հստակ և անմիջական ազդեցություն ունենալ մեր բարեկեցության վրա.

• հանգստացնող մեղեդին հեշտացնում է քնի գործընթացը,
• ուրախ պարային երաժշտությունը ստեղծում է մարզվելու շարժառիթ,
• երգելը նպաստում է ինքնարտահայտմանը,
• կենդանի երաժշտական կատարումը վայելելը շփման հաճելի առիթ է:

Հարցեր, պատասխաններ, մեկնաբանություններ