Գիտնականները հերքել են մարդու մարմնում մանրէների թվի մասին հանրահայտ առասպելը. news.am

Կանադացի եւ Իսրայելցի գիտնականները հերքել են ընդունված առասպելն այն մասին, թե մեր աղիքներում եւ մարմնի այլ մասերում մանրէների թիվը  10 անգամ ավելի շատ է, քան մարդու օրգանիզմում բջիջների քանակը: Այդ մասին ասված է Քոլդ-Սփրինգ-Արբոր լաբորատորիայի էլեկտրոնային գրադարանում հրապարակված հոդվածում:

«Օրգանիզմում բջիջների եւ մանրէների քանակը մոտավորապես հավասար է եւ աղիների յուրաքանչյուր դատարկում, որպես կանոն, հանգեցնում է նրան, որ մեր բջիջները ժամանակավորապես առավելություն են ստանում մանրէների հանդեպ», — ասվում է հոդվածում:

Ռեխովոտում (Իսրայել) Վայցմանի անվան գիտության ինստիտուտից Ռոն Զենդերը (Ron Sender) եւ իր գործընկերներն այդ եզրակացության են հանգել` երկրորդ անգամ հաշվելով միջին քաշի ու հասակի մարդու օրգանիզմում բջիջների եւ մանրէների թիվը, գնալով այն հայտնի փորձարկումների հետքերով, որոնք 1972-ին  իրականացնում էր այժմ հայտնի միկրոկենսաբան Թոմաս Լաքին (Thomas Luckey): Այն ժամանակ նրա հաշվարկները ցույց էին տվել, որ մարդկային մարմինն իր մեջ մոտավորապես 10 անգամ ավելի շատ օգտակար եւ հիվանդածին մանրէ է պարունակում, քան բջիջներ, ինչն աղիքների միկրոֆլորայի եւ մեր մարմնի փոքրագույն բնակիչների ուսումնասիրման հսկայական հետաքրքրություն առաջացրեց:

Զենդերի խումբը տասնյակ այլ հրապարակումներ է ուսումնասիրել, ինչպես նաեւ մագնիսառեզոնանսային տոմոգրաֆիայի միջոցով տարբեր օրգաններում բնակչության «խտության» գնահատականներ է ստացել: Դրանց հաշվարկները ցույց են տվել, որ մարդու մարմինն իր մեջ մոտավորապես 30 տրլն բջիջ է պարունակում, որոնց առյուծի բաժինը` 24 տրլն, էրիթրոցիտներ են: Մեկ տրլն կազմում են տրոմբոցիտները, իսկ մնացած ամբողջ օրգանիզմն ընդամենը երեք տրլն բջիջ է պարունակում:

Պարզվել է, որ մանրէների թիվը` 39 տրլն, անհամեմատ ավելի փոքր է, քան Լաքիի կանխատեսածը: Դա կապված է նրա հետ, որ, ինչպես նշում են հոդվածի հեղինակները, Լաքին միկրոֆլորայի գնահատման սխալ մեթոդ է օգտագործել` սխալմամբ համարելով, որ  բարակ աղիքում մանրէների «բնակչության խտությունը» մոտավորապես նույնն է, ինչ հաստ աղիքում, ինչը բոլորովին այդպես չէ:

Այսպիսով` մանրէներն իրականում ոչ թե 10 անգամ են շատ բջիջներից, այլ ընդամենը  1,3 անգամ, ինչը հերքում է մարդու մարմնում մանրէների «տիրապետման» բազմամյա առասպելը:

Հարցեր, պատասխաններ, մեկնաբանություններ