Շվեդ գիտնականները հանցագործության հակվածությունը կապել են զարկերակի հաճախականության հետ. 1in.am

Շվեդիայի Կարոլինյան ինստիտուտի գիտնականները բացահայտել են կախվածություն զարկերակի ցածր հաճախականության և հակահասարակական վարքի միջև: Արդյունքները հետազոտողները հրապարակել են JAMA Psychology ամսագրում:

Դիտարկումների համաձայն՝ 18 տարեկան դեռահասները, որոնց զարկերակի հաճախականությունը հասակակիցների հետ համեմատած ավելի ցածր է եղել, հետագայում ավելի շատ են հանցագործություն կատարել բռնության տեսքով` թալանից մինչև ավազակություն:

Հետազոտությունների արդյունքում վերլուծվել են շուրջ 710 հազար տղամարդկանց տվյալներ: Դրանք վերցվել են պետական բժշկական հիմնարկներից, որտեղ ստուգումներ են կատարվել տղաների զինվորական ծառայության անցնելուց առաջ: Մինչև 2009 թվականը այդ ստուգումները պարտադիր էին Շվեդիայում:

Այնուհետև տվյալներ են հավաքել այն մասին, թե արդյոք այդ մարդկանց մոտ հետագայում հայտնվել է դատական գործ:

Տղամարդկանց բաժանել են հինգ խմբի` ըստ իրենց սրտի զարկերի հաճախականության: Ամենադանդաղ հաճախականությամբ սրտի զարկերով տղամարդկանց խմբում եղել են շուրջ 133 հազար մարդ` րոպեում 35-60 զարկով: Իսկ ամենաարագների խմբում եղել է շուրջ 140 հազար մարդ` 83-145 զարկով:

Չնայած առաջին խումբը թվով ավելի քիչ է եղել, այնտեղից ավելի շատ մարդ էր հետագայում հանցագործություն կատարել:
Այնուհանդերձ, հետազոտողները նշել են, որ ընդհանուր օրինազանցների թիվը քիչ է եղել` բոլոր հինգ խմբերի մարդկանց 94 տոկոսը երբեք հանցագործություն չեն կատարել:

Գիտնականները եզրահանգել են, որ ցածր հաճախականությամբ սրտի զարկերով մարդկանց մոտ հանցագործություն կատարելու հավանականությունը 50 տոկոսով ավելի բարձր է, քան նրանց մոտ, ում սիրտը ավելի արագ է բաբախում:

Հոդվածում բացատրվում է, որ այդ գործոնը չի կարելի բացատրել այլ գործոններով, օրինակ հոգեբանական, ֆիզիկական կամ սոցիալ-տնտեսական:
Ենթադրություններից մեկն այն է, որ ցածր զարկի տեպքում մարդիկ այնքան էլ սուր չեն զգում վախը: Իսկ մյուսն էլ այն է, որ նրանք ցանկանում են բարձրացնել իրենց ֆիզիոլոգիական ակտիվությունը` կատարելով հակաիրավական գործողություններ:

Հարցեր, պատասխաններ, մեկնաբանություններ