ԱՄՆ-ում մայրական մահացության մակարդակը գերազանցում է այլ զարգացած երկրների ցուցանիշներին. 1in.am

ԱՄՆ-ում մայրական մահացության մակարդակը գերազանցում է այլ զարգացած երկրների ցուցանիշներին։ Այս մասին ասվում է Save the Children բարեգործական կազմակերպության հաշվետվությունում՝ փոխանցում է BBC-ն։

Մայրական մահացությունը վերաբերում է հղի կանանց, ինչպես նաև ծննդկանների մահվան դեպքերի հաճախականությանը։

Կազմակերպությունը պարզել է, որ հղիության կամ ծննդաբերության ժամանակ մահանալու շանսերն ԱՄՆ-ում 10 անգամ ավելի են, քան Լեհաստանում, Ավստրիայում և Բելառուսում։

Համաձայն հաշվետվության՝այս հարցում զգալի ճեղքվածք կա խոշոր քաղաքներում ապրող հարուստ և աղքատ կանանց ցուցանիշների միջև։

Կազմակերպությունը բարձր է գնահատել բժշկության հաջողությունները մայրական և մանկական մահացության կրճատման գործում երրորդ աշխարհի որոշ երկրների մայրաքաղաքներում, ինչպիսիք են Կամպալան (Ուգանդա), Ադիս-Աբեբան (Եթովպիա) և Մանիլան (Ֆիլիպիններ)։

ԱՄՆ-ն 33-րդ տեղում է։ Մայրության համար բարենպաստ պայմաններով առաջատարներն են Նորվեգիան, Ֆինլանդիան և Իսլանդիան։ Երկրորդ տարին անընդմեջ Սոմալին զբաղեցնում է վերջին հորիզոնականը։

Հարցեր, պատասխաններ, մեկնաբանություններ