Թարթիչների նոր գործառույթը՝ ըստ ամերիկացի գիտնականների. 1in.am

Թարթիչները ոչ միայն գործում են որպես ֆիլտր օտար մասնիկների համար, այլև աչքերից հեռացնում են օդի հոսքերը: Այսպիսի եզրակացության է եկել ամերիկացի գիտնականների խումբը՝ հայտնում է BBC-ի ռուսական ծառայությունը:

Ըստ գիտնականների՝ թարթիչները հեռացնում են օդի հոսքերը՝ աչքերը պաշտպանելով բակտերիաներից, վիրուսներից ու փոքր մակաբույծներից, ինչպես նաև կանխելով աչքի թաղանթի չորացումը:

Թարթիչները «50%-ով նվազեցնում են խոնավության գոլորշիացումը և աչքում մասնիկների ընկնելը»,- ասում է հետազոտության ղեկավար Դևիդ Հուն՝ Ատլանտայում Ջորջիայի տեխնոլոգիական ինստիտուտից:

Ուսումնասիրությունը կատարվել է 22 տեսակի կաթնասունների շրջանում, այդ թվում՝ մարդու: Բոլոր դեպքերում թարթիչների երկարությունը կազմել է աչքերի լայնության մեկ երրորդը, ինչը, գիտնականների կարծիքով, լավագույն համամասնությունն է առավելագույն պաշտպանության համար՝ առանց տեսողության որակի վնասի:

Այս բացահայտումը կարող է օգնել՝ մշակելու ավելի կատարելագործված պաշտպանական համակարգեր, օրինակ՝ արևային մարտկոցներ, որոնք տարեկան 6% արդյունավետություն են կորցնում մակերևույթին փոշու կուտակման պատճառով՝ նշում են գիտնականները:

Հարցեր, պատասխաններ, մեկնաբանություններ