Տասը տարի անց Եվրոպան հնարավոր է մնա առանց բուժաշխատողների

Առողջապահության ոլորտի խնդիրների վերաբերյալ եվրոպական համաժողովի մասնակիցները ոչ հուսադրող եզրահանգման են եկել. 2020 թվականին Եվրոպան կմնա առանց բուժաշխատողների: «ԻՏԱՌ-ՏԱՍՍ»-ի փոխանցմամբ, Եվրոպայում շուրջ 2 մլն բուժաշխատողի պակաս կզգացվի` այդ թվում` 230 հազար բժիշկ, 600 հազար սպասարկող բուժանձնակազմ:

Ըստ համաժողովի մասնակիցների, շատ վատ դրության մեջ կհայտնվեն քիչ զարգացած տնտեսություն ունեցող երկրները, քանզի դրանց որակավորված կադրերը կլքեն իերնց երկիրը և կտեղափոխվեն առավել հարուստ երկրներ: Համաշխարհային բանկի առողջապահության ոլորտում ռազմավարական հարցերով խորհրդական Առմին Ֆիդլերը այդ կապակցությամբ մի շարք թվային տվյալներ է ներկայացրել` մասնավորապես, պարզվում է, որ այժմ Մեծ Բրիտանիայում աշխատող բժիշկների 47 տոկոսը միգրանտ-բժիշկներ են: Իսկ ահա լեհական առողջապահության ոլորտում այլ երկրներից եկած մասնագետների թիվը կազմում է 3 տոկոս:

Ռումինիայից Արևելյան Եվրոպայում աշխատանք փնտրողների 10 տոկոսը բուժաշխատողներ են: Ըստ Ֆիդլերի, դա ունի իր պատճառները` օրինակ Ֆրանսիայում ընդհանուր պրոֆիլի ցանկացած մասնագետ կարող է տասն անգամ բարձր վարձատրվել, քան իր հայրենիքում: Բացի ֆինանսական ակնկալիքներից, բուժաշխատողների միգրացիայի պատճառը կարող են լինել կենսական պայմանները, ինչպես նաև մասնագիտական աճի անհեռանկար լինելը:

ՀԲ ներկայացուցչի խոսքով, պետք չէ մարդուն զրկել լավ ապրելու իրավունքից:

Հարցեր, պատասխաններ, մեկնաբանություններ