ՄԱԿ–ը ահազանգում է. մարդկությունը մահանում է ոչ ինֆեկցիոն հիվանդությունների 4 տեսակից

Միավորված ազգերի կազմակերպության (ՄԱԿ) փորձագետներն այն եզրակացության են եկել, որ աշխարհում մահացության դեպքերի մեծամասնության գլխավոր պատճառը ոչ ինֆեկցիոն հիվանդություններն են, ինչպես օրինակ, քաղցկեղը, շաքարային դիաբետը, սրտի և թոքերի հիվանդությունները։
Ինչպես նշվում է կազմակերպության հրապարակած նոր զեկույցում, աշխարհում մարդկանց մահացության բոլոր դեպքերի 2/3–ը գրանցվել է ոչ ինֆեկցիոն հիվանդությունների վերոնշյալ 4 տեսակներից։

Մասանգետներն անհանգստացած են, քանի որ այդ հիվանդությունների մասշտաբներն արագ կերպով ընդլայնվում են։ Զեկույցում նշվում է, որ քանի դեռ  միջազգային հանրությունն իր ջանքերը համախմբել է ինֆեկցիոն հիվանդությունների (ինչպիսիք են՝ ՄԻԱՎ/ՁԻԱՀ–ը, մալարիան և տուբերկուլյոզը) դեմ պայքարում, ոչ ինֆեկցիոն հիվանդությունների վերոնշյալ 4 տեսակները զարգացող երկրներում «աննկատ առաջին պլանում են հայտնվել և արդեն գլոբալ համաճարակի վերածվել»։

Զեկույցի համաձայն՝ 2008թ. աշխարհում ոչ ինֆեկցիոն հիվանդություններրից 36 մլն մարդ է մահացել (մահացության դեպքերի ընդհանուր թվի 63 տոկոսը)։ Դեպքերի 80 տոկսը գրանցվել է զարգացող երկրներում, ընդ որում, մահացածներից  9 միլիոնը մինչև 60 տարեկան տղամարդիկ և կանայք են եղել։

Ինչպես հաղորդում է ռուսական «ԻՏԱՌՌ ՏԱՍՍ» գործակալությունը, զեկույցի հեղինակները կանխատեսում են, որ 2030թ. ոչ ինֆեկցիոն հիվանդությունները 52 մլն մարդու կյանք կխլեն։

Փորձագետներն այդ տագնապալի դինամիկան պարզաբանում են ռիսկի այնպիսի աճող գործոններով, ինչպիսիք են՝ ծխելը, անառողջ սնունդը, ֆիզիկական ակտիվության պակասը, գիրությունը և ալկոհոլի չարաշահումը։ Մասնագետները խոստովանում են, որ  որոշակի դեր են խաղում նաև ուրբանիզացիայի բացասական ազդեցությունը, առևտրի գլոբալիզացիան, ծերացող հասարակությունը։

Հարցեր, պատասխաններ, մեկնաբանություններ