2010 թ-ին արձանագրվել է ծնելիության բացարձակ թվաքանակի 0.9 % աճ

2010 թվականի արդյունքների հիման վրա օպերատիվ ամփոփված ժողովրդագրական ցուցանիշներով ՀՀ մշտական բնակչության թվաքանակը 2011թ. հունվարի 1-ի դրությամբ կազմել է 3262.2 հազ.մարդ: Այս մասին այսօր լրագրողների հետ հանդիպմանն ասաց ՀՀ Ազգային վիճակագրական ծառայության պետ... Ստեփան Մնացականյանը: 

««Հայաստանի Հանրապետության սոցիալ-տնտեսական վիճակը 2010 թվականի հունվար-դեկտեմբերին» տեղեկատվական ամսական զեկույցի համաձայն` նախորդ տարեսկզբի նկատմամբ արձանագրվել է թվաքանակի 12.7 հազ-ով աճ (0.4%), 2010 թ-ին արձանագրվել է ծնելիության բացարձակ թվաքանակի աճ` 0.9%-ով (2010 թ-ին գրանցվել են 44810 ծնվածներ, 2009 թ-ի 44413 ծնվածների համեմատ), իսկ ծնելիության ընդհանուր գործակիցը 1000 բնակչի հաշվով, կազմել է 13.8 պրոմիլ` 2009 թ-ի 13.7 պրոմիլի դիմաց, մահացության ընդհանուր գործակիցը 2010 թ-ին 2009 թ-ին արձանագրված մահացության մակարդակի համեմատ աճել է` 0.1 պրոմիլային կետով (2010 թ. մահվան 28008 դեպք, 2009 թ-ին արձանագրված 27560-ի դիմաց), գրանցվել է մայրական մահացության 4 դեպք` 2009 թ-ի 12 դեպքի դիմաց, կյանքի առաջին տարում արձանագրվել է մանկական մահացության 506 դեպք (11.5 % աճ), իսկ մանկական մահացության գործակիցը կազմել է 11.3 պրոմիլ` 2009 թ-ի 10.4 պրոմիլի համեմատ (1000 կենդանի ծնվածի հաշվով)», - նշեց Ս.Մնացականյանը:

Բանախոսի հաղորդմամբ` 2010թ. գրանցված ամուսնությունների քանակը 2009 թ-ի համեմատ նվազել է 4.2 %-ով և կազմել 17984, իսկ ամուսնալուծությունների քանակն աճել է 5.9%-ով և կազմել 2997 (1000 ամուսնական զույգերի համեմատ արձանագրվել է ամուսնալուծության 167 դեպք, 2009 թ-ին`151):

«Հայաստանի Հանրապետության սոցիալ-տնտեսական վիճակը 2010 թվականի հունվար-դեկտեմբերին» տեղեկատվական ամսական զեկույցը երկրի 2010 թվականի սոցիալտնտեսական վիճակն արտացոլող համեմատաբար ընդգրկուն վիճակագրական յուրաժամանակ (օպերատիվ) հրապարակումն է: Զեկույցի բովանդակությունը ներկայացվում է Արժույթի միջազգային հիմնադրամի (ԱՄՀ) կողմից մշակված Տվյալների տարածման ստանդարտներով սահմանված հատվածներին համապատասխան:

Հարցեր, պատասխաններ, մեկնաբանություններ