ՀՀ բնակչության թիվը հասել է 3 մլն 262 հազարի. վիճակագրություն

Ըստ 2011թ.-ի հունվարի 1-ի տվյալների, ՀՀ բնակչության թիվը, 2010թ.-ի նույն ժամանակահատվածի համեմատ, աճել է 12,7 հազարով և 3 մլն 262,2 հազար կազմել, հայտնեց Ազգային վիճակագրական ծառայության պետ Ստեփան Մնացականյանը: 
«2010թ.-ին ծնելիության բացարձակ ցուցանիշն աճել է 0,9 տոկոսով, լույս աշխարհ է եկել ավելի քան 44 810 նորածին՝ 2009թ.-ի 44 413-ի դիմաց, իսկ հազար բնակչի հաշվով՝ ծնելիության ընդհանուր ցուցանիշը 0,1 պրոմիլով աճել է և 13,8 պրոմիլ կազմել»,- ասաց նա: 

Ըստ պաշտոնական վիճակագրության տվյալների, 2010թ.-ին Հայաստանում 28 008 մարդ է մահացել: Ընդ որում, մայրական մահացության չորս դեպք է գրանցվել՝ 2009թ.-ի 12-ի դիմաց:

Կյանքի առաջին տարում մահացության 506 դեպք է գրանցվել, ինչը 11,5 տոկոսով բարձր է 2009թ.-ից, իսկ մանկական մահացության ցուցանիշը 11,3 պրոմիլ է կազմել՝ 2009թ.-ի 10,4-ի դիմաց:

2010թ.-ին Հայաստանում 4,2 տոկոսով ավելի քիչ ամուսնություն է գրանցվել, քան 2009թ.-ին՝ կազմելով 17984, իսկ ամուսնալուծությունների թիվն ավելացել է 5,9 տոկոսով և կազմել 2997:

Հարցեր, պատասխաններ, մեկնաբանություններ