Ովքե՞ր կարող են անվճար բուժվել եւ ովքե՞ր պետք է համավճար մուծեն

Արդեն տեղեկացրել ենք, որ անհետաձգելի եւ գինեկոլոգիական բժշկական օգնության ծրագրերում 2011 թվականի փետրվարի 1-ից ներդրվել է համավճարի համակարգը։

Ծրագրի հեղինակները վստահեցնում են, որ այդպիսով իրավական դաշտ են բերվում մինչ այս գոյություն ոնեցող ստվերային վճարումները։ Ասել է, թե ընթացիկ տարվա փետրվարի 1-ից պետպատվերի ցանկում ընդգրկված մի շարք ծառայությունների դիմաց մասամբ վճարելու է հիվանդը։

Դրանց թվին չեն պատկանում ինչպես 7-18 տարեկան, այնպես էլ 18 տարեկան եւ բարձր տարիքի անձանց համար վերակենդանացման միջոցառումներ եւ ինտենսիվ թերապիա պահանջող հետեւյալ հիվանդությունները եւ վիճակները.

մինչեւ 18 տարեկան անձանց համար՝

• շոկային վիճակներ՝ 2-րդ եւ ավելի աստիճանի,
• կոմատոզ վիճակներ,
• սուր շնչական անբավարարություն՝ 2-րդ աստիճանի եւ բարձր,
• ասֆիքսիա,
• սրտի կանգ,
• ցնցումային համախտանիշ՝ գիտակցության կորստով,
• անուրիա,
• շնչառության կանգ,
• էկզոգեն թունավորումներ (կենդանիների խայթոց, դեղորայքային եւ քիմիական նյութերով թունավորումներ)։

18 տարեկան եւ բարձր տարիքի անձանց համար՝

• շոկային վիճակներ՝ 2-րդ եւ ավելի աստիճանի,
• կոմատոզ վիճակներ,
• դիաբետիկ կոմա (հիպոգլիկեմիկ),
• սուր շնչական անբավարարություն՝ 2-րդ աստիճանի եւ բարձր,
• սրտի փորոքների ֆիբրիլյացիա եւ թրթռոց (տախիսիստոլիկ ձեւ), սրտի կանգ,
• էկզոգեն թունավորումներ (ալկոհոլային՝ մինչեւ 2 օրվա գնով, կենդանիների խայթոցից, դեղորայքային եւ քիմիական նյութերով թունավորումներ,
• էպիլեպտիկ ստատուս՝ գիտակցության կորստով,
• ծանր աստիճանի պրեէկլամպսիա եւ էկլամպսիա,
• տարբեր տեսակի էմբոլիաներ, HELLP սինդրոմ,
• սրտամկանի սուր ինֆարկտ,
• ինսուլտ (հեմոռագիկ, իշեմիկ),
• պոլիտրավմա (խոշոր ոսկրերի եւ/կամ ներքին օրգանների համակցված վնասվածքներ),
• ցրտահարություն՝ 2, 3–րդ աստիճանի,
• ընդհանուր սառեցում։

Թվարկված հիվանդությունների ու վիճակների բուժումը մնում է պետության կողմից երաշխավորված անվճար ծառայությունների ծրագրում։
Ինչպես նախորդիվ խոստացել էինք, ներկայացնում ենք նաեւ այն հիվանդությունների եւ վիճակների ցանկը, որոնց բուժման ժամանակ 2011 թվականի փետրվարի 1-ից կիրառվում է առողջապահական պետական նպատակային ծրագրերի շրջանակներում ՀՀ պետական բյուջեի հաշվին արտոնյալ պայմաններով բժշկական ծառայությունների փոխհատուցման նոր կարգը՝ ՀՀ կառավարության 2004թ. մարտի 4-ի թիվ 318-Ն որոշմամբ սահմանված դրույթների համաձայն։ Իսկ ավելի պարզ ասած՝ գործում է համավճարի համակարգը։

Ցանկը հաստատվել է ՀՀ առողջապահության նախարարի հրամանով։

• շիճուկային հիվանդություն,
• սուր թրոմբոզներ եւ թրոմբոէմբոլիաներ՝ բացաությամբ՝ թութքի (միայն վիրահատական միջամտությամբ ավարտված դեպքերը),
• Գիյեն-Բարեի սուր պոլինեյրոպաթիա՝ պարալիչի զարգացումով,
• ինսուլտ (հեմոռագիկ, իշեմիկ),
• սրտամկանի սուր ինֆարկտ,
• սուր երիկամային անբավարարություն,
• գլաուկոմայի սուր նոպա (ներակնային ճնշումը 40 մմ սնդ. սյուն եւ ավելի),
• ցանցաթաղանթի կենտրոնական անոթների սուր անանցանելիություն,
• տեսողական օրգանի վնասվածքներ, ակնախնձորակի ամբողջականության խախտում,
• պնեւմոթորաքս (սպոնտան եւ վնասվածքային),
• սեպսիս (արյան ցանքսով հաստատված),
• տարածուն պերիտոնիտ,
• խոռոչավոր օրգանների թափածակում,
• սուր որովայն (օղակված ճողվածք, տարածուն պերիտոնիտ)՝ միայն ՀՀ մարզերի բուժհաստատություններում,
• արտաքին եւ ներքին (երակային եւ զարկերակային) պրոֆուզ արյունահոսություններ (բացառությամբ քթային արյունահոսությունների եւ թութքի), տարածուն հեմատոմաներ, ներանոթային տարածուն մակարդման (ԺԹհ) համախտանիշ,
• ոսկրերի կոտրվածքներ (փակ եւ բաց)՝ բեկորների տեղաշարժով (ողնաշարի, կոնքի ոսկրեր, բազկոսկր, ճաճանչոսկր, ազդրոսկր, մեծ ոլոք, կրծոսկր, վեգոսկր, ծնկոսկր, ծղիկոսկր, թիակոսկր),
• գանգուղեղային (գլխուղեղի սալջարդ) եւ ողնուղեղի վնասվածքներ,
• թափանցող վնասվածքներ՝ կրծքավանդակի, որովայնի, կոնքի օրգանների, գլխուղեղի, ողնուղեղի վնասվածքներով,
• պոլիտրավմա (խոշոր ոսկրերի եւ/կամ ներքին օրգանների համակցված վնասվածքներ),
• մարմնի արտաքին ծածկույթի այրվածքներ՝ 1-ին աստիճանի՝ մարմնի 50 տոկոսից ավելի մակերեսով, 2-րդ աստիճանի՝ մարմնի 10 տոկոսից ավելի մակերեսով, 3-4-րդ աստիճանների այրվածքներ՝ մարմնի 1 տոկոս եւ ավելի մակերեսով,
• սուր հեմոլիտիկ կրիզներ, սակավարյունություն (Hb-60 գ/լ եւ պակաս կամ էրիթրոցիտների քանակը՝ 1.7x1012/լ եւ պակաս),
• անոթային անեւրիզմաների պատռվածքներ եւ շերտազատումներ,
• ձվարանի ապոպլեքսիա,
• արտարգանդային հղիություն,
• բշտիկային զանգված, խորիոնէպիթելիոմա,
• արգանդային արյունահոսություններ տարբեր էթիոլոգիաների (արգանդի միոմա, պոլիպ, պոլիպոզ, արտաքին սեռական օրգանների պատերի վնասվածքներ),
• միոմատոզ հանգույցի, ձվարանի ուռուցքների, ուռուցքանման եւ թարախային գոյացությունների տոտիկի ոլորում, պատյանի պատռում, հանգույցի նեկրոզ, ծնվող ենթալորձային միոմատոզ հանգույց,
• մանկաբարձական սեպսիս։

Ի դեպ, պետության կողմից երաշխավորված անվճար անհետաձգելի հիվանդանոցային բժշկական օգնություն պահանջող հիվանդությունների եւ վիճակների՝ ՀՀ առողջապահության նախարարի հրամանով սահմանված չափորոշիչները, որում ընդգրկված են թե՛ այն հիվանդություններն ու վիճակները, որոնց ժամանակ բնակչության բոլոր խավերի համար բուժօգնությունը եւ սպասարկումն իրականացվում է անվճար, թե՛ այն դեպքերը, որոնք իրականացվում են համավճարի սկզբունքով, պետք է փակցված լինեն բոլոր հիվանդանոցներում։ Ընդ որում, հրապարակային պետք է լինեն նաեւ համավճարների սահմանված չափերը։ Դրանց բացակայության դեպքում կարող եք դիմել ՀՀ առողջապահության նախարարությունում կամ մարզպետարաններում գործող թեժ գծերին։

Հարցեր, պատասխաններ, մեկնաբանություններ