Գլխի փոխպատվաստման առաջին հավակնորդը ռուսաստանցի ծրագրավորող է. news.am

Առաջին մարդն աշխարհում, ով կարող է ենթարկվել գլխի փոխպատվաստման, Վալերի Սպիրիդոնովն է՝ 30-ամյա ռուսաստանցի ծրագրավորողը, ով տառապում է մեջքի մկանների ատրոֆիայով։

2017 թվականին գլխի փոխպատվաստման վիրահատություն անցկացնելու մասին հայտարարել էր այս տարվա փետրվարին իտալացի նյարդավիրաբույժ Սերժիո Կանավերոն, սակայն այս մտադրություններին բացասաբար արձագանքեց գիտական աշխարհը։ Գլխի փոխպատվաստման վիրահատությունն արդեն իսկ կատարվել է 1970-ականներին։ Գլուխը փոխպատվաստվել էր կապիկին, որը նոր մարմնով ապրեց 9 օր, սակայն կենդանու իմունային համակարգը վանեց օտարածին այս օրգանը։

Սպիրիդոնովն ու Կանավերոն շփվում են Skype-ի միջոցով, ընդ որում՝ իտալացի բժիշկը հայտարարել է, որ հիվանդների ընտրության հարցում առաջնահերթությունը տրվելու է մեջքի մկանների ատրոֆիայով (СМА) տառապողներին, հաղորդում է Daily Mail-ը։

СМА-ն գենետիկական հիվանդություն է, որի պատճառով վաղ մանկությունից մարդու մոտ կանգ է առնում մկանների զարգացումը։ Այս հիվանդությամբ տառապող երեխաների 50 տոկոսը մահանում է մինչեւ մեկ տարին լրանալը, սակայն Սպիրիդոնովին հաջողվեց կենդանի մնալ մինչեւ 30 տարեկան եւ բարձրագույն կրթություն ստանալ։ Այնուամենայնիվ, նրա այսօրվա մարմնով դժվար թե հաջողվի կենդանի մնալ հետագայում։

Սպիրիդոնովի ընտանիքը միանգամայն կողմ է նրա որոշմանը, չնայած որ գիտակցում է բոլոր հնարավոր վտանգները։

Մարմնի դոնորի դերում, Սպիրիդոնովի խոսքով, կարող են հանդես գալ գլխուղեղի մահացու վնասվածք ստացածները կամ մահապատժի ենթարկված հանցագործները։

Հարցեր, պատասխաններ, մեկնաբանություններ