ԱՄՆ-ում 10-ամյա երեխային հաջողությամբ թոքերի փոխպատվաստում են կատարել

Ֆիլադելֆիայի մանկական հիվանդանոցում հաջողությամբ կատարվել է 10-ամյա ամերիկուհի Սառա Մուրհանենի թոքերի փոխպատվաստման վիրահատությունը։ Սառան մահանում էր կիստոզ ֆիբրոզից, որը բնորոշվում է շնչառական օրգանների գործառույթների խախտմամբ: Այս մասին հայտնում է ITAR-TASS-ը:

Վերջին օրերին Սառայի պատմությունը հայտնվել է գրեթե բոլոր ամերիկյան ԶԼՄ-ների ուշադրության կենտրոնում:

Բանն այն է, որ համաձայն ԱՄՆ օրենսդրության՝ մինչև 12 տարեկան երեխաները պետք է սպասեն դոնորական օրգանների «ցուցակում», որն ավելի դանդաղ է «շարժվում», քան մեծահասակներինը:

Սառան կես տարի սպասում էր փոխպատվաստման իր հերթին, սակայն վերջին ամիսներին նրա վիճակը կտրուկ վատացել էր, ու նրա ծնողները դիմել էին դատարան՝ խնդրելով թույլատրել աղջկա անունը ներառել մեծահասակների սպասման ցուցակում:

Անցած շաբաթ դատարանը նրանց հայցը բավարարել էր: Ժամկետը լրանում էր հունիսի 14-ին:

Այս ժամանակահատվածը բավարար էր դոնոր գտնելու ու վիրահատություն կատարելու համար:

Աղջկա վիրահատությունը տևել է մոտ 6 ժամ:

Հարցեր, պատասխաններ, մեկնաբանություններ