Ցողունային բջիջներից աճեցված հյուսվածքների` աշխարհում առաջին փոխպատվաստումը սկանդալի պատճառ է դարձել

Ոչ սաղմնային ծագմամբ արհեստական բազմաֆունկցիոնալ ցողունային բջիջներից աճեցված հյուսվածքների` աշխարհում առաջին փոխպատվաստման մասին ճապոնացի հետազոտող Հիսասի Մորիգուտիի սենսացիոն հայտարարության շուրջ սկանդալ է ծագել: Նրա խոսքով` փոխպատվաստման վիրահատությունը կատարվել է Հարվարդի համալսարանին կից հիվանդանոցում: Այս մասին հայտնում է ITAR-TASS-ը:

Սակայն այսօր Հարվարդի համալսարանն ու Մասաչուսեթսի հիվանդանոցը հայտարարել են, որ չեն արտոնել Մորիգուտիին որևէ վիրահատություն անցկացնել: Նրանց հայտարարությունում ասվում է, որ ճապոնացին հիվանդանոցում 1999-2000 թթ եղել է հրավիրված հետազոտող, սակայն դրանից հետո նա որևէ կապ չի ունեցել ո՛չ բուժհաստատության, ո՛չ էլ Հարվարդի հետ:

«Կիոդո» գործակալության հետ հարցազրույցում` Մորիգուտին վստահեցնում է, որ իրեն վիրահատության անցկացման համար արտոնել էր Հարվարդի համալսարանի Էթիկայի հանձնաժողովը:

Ներկայում Մորիգուտին ունի Տոկիոյի համալսարանին կից հատուկ հետազոտողի կարգավիճակ:

Հարցեր, պատասխաններ, մեկնաբանություններ